ქეით და დალტონ პრაგერების ისტორია ზღაპარს მოგაგონებთ. სამწუხაროდ, რეალობაში არ ვართ განებივრებული ბედნიერი დასასრულებით, როგორც ხშირად გამოგონილ ზღაპრებში ხდება.
ახალგაზრდა შეყვარებულები 18 წლის ასაკში შეხვდნენ ერთმანეთს და ორი წლის შემდეგ იქორწინეს. ქეითი და დალტონი 5 წელი იყვნენ ერთად. მეგობრები ამბობენ, რომ მათთვის ეს ერთად გატარებული 5 წელი ნამდვილი სამოთხე იყო.
ბავშვობიდან ორივე კისტოზური ფიბროზით იყო დაავადებული. ეს არის მემკვიდრეობითი დაავადება, რომელიც აზიანებს ფილტვებს და მაღალი სიკვდილიანობით ხასიათდება. ჯერ კიდევ ახალგაზრდებმა იცოდნენ, რომ განწირულები იყვნენ. ერთმანეთი სოციალური ქსელით გაიცნეს - საერთო პრობლემამ დააახლოვა ისინი.
როდესაც ერთმანეთს შეხვდნენ- მაშინვე მიხვდნენ, რომ ეს ბედი იყო. 20 წლის ასაკში დაქორწინდნენ. დალტონმა და ქეითმა იცოდნენ, რომ ცოტა დრო ჰქონდათ დარჩენილი და ცდილობდნენ დამტკბარიყვნენ ცხოვრებით ისე, როგორც შეეძლოთ. ბევრს მოგზაურობდნენ და მეგობრებთან ერთად ატარებდნენ დროს.
4 წელი ბედნიერად იცხოვრეს. შემდეგ კი შავი ღრუბლები ჩამოწვა ჰორიზონტზე... ორივესთვის უნდა გადაენერგათ ფილტვები. 2014 წლის ნოემბერში დალტონს ჩაუტარდა ოპერაცია. ქეითი რიგს 2015 წლის ივლისში ელოდა. თავიდან თითქოს ყველაფერი კარგად მიმდინარეობდა, მაგრამ რამდენიმე თვეში დალტონს სიმსივნე აღმოაჩნდა. ქეითის ჯანმრთელობაც შეირყა. გადანერგილი ორგანო ვერა და ვერ შეეწყო ორგანიზმს. ბოლოს და ბოლოს გამოიკვეთა, რომ ახალგაზრდებს სხვა გზა აღარ ჰქონდათ...
დალტონს და ქეითს ძალიან უყვარდათ შობის დღესასწაული. იცოდნენ, რომ იქამდე შეიძლება ვეღარ მიეღწიათ და ამიტომ გადაწყვიტეს, შობა სექტემბერში გადმოეტანათ. სამწუხაროდ, ეს გეგმაც აუსრულებელი დარჩათ.
დალტონი უკვე ემზადებოდა საავადმყოფოდან გასაწერად და ქეითთან გასამგზავრებლად, როდესაც 17 სექტემბერს, დაავადების გამწვავების გამო იგი გარდაიცვალა. რამდენიმე დღეში მას ქეითიც მიჰყვა. ცოლ-ქმარი სხვადასხვა საავადმყოფოში იწვა და ყოველდღე ინტერნეტით საუბრობდნენ... როდესაც დალტონი გარდაიცვალა, ქეითმა უთხრა მშობლებს, რომ ძალიან მალე შეხვდებოდა მეუღლეს...
ახლობლები და მეგობრები თვლიან, რომ მათი სიყვარული მარადისობაში გადავიდა.