ბავშვებს ხელში ვერ დაუნახავთ აიპედებს და არც კომპიუტერის თამაშებში არიან ჩაფლულები პარლამენტის წევრი ნინო წილოსანი ბახმაროს შესახებ წერს:
"იცით, რატომ ამოდიან ბახმაროში 21-დღიანი დასვენებით?
მოუახლოვდები თუ არა აქაურობას, მომენტალურად გრძნობ, როგორ გეჯახება ფილტვებზე სუფთა ჰაერი;
ირგვლივ ყველაფერი მწვანეა, სახლებიც ეკოლოგიურად სუფთაა - ხისგან არის ნაშენები;
ბავშვებს ჩვენდა გასაკვირად, ხელში ვერ დაუნახავთ აიპედებს და არც კომპიუტერის თამაშებში არიან ჩაფლულები; ისინი ჩვეულებრივი, ბავშვური თამაშებით ერთობიან - აი, ისეთებით, ჩვენ რომ ვერთობოდით...
დედები სადილებს აკეთებენ და უამრავი დრო აქვთ შვილებთან გასატარებლად;
ჩამოჯდები მოსასვენებლად და წინ საოცარი ხედი გაქვს ფიქრებში წასვლისთვის, მედიტაციისთვის;
საღამოს ერთადერთი გასართობი ისევ ერთმანეთთან ურთიერთობაა, ყოველგვარი დამხმარე საშუალებების გარეშე, მხოლოდ ადამიანური ურთიერთობები.
დილით იღვიძებ და ისევ იგივე იწყება - სუფთა ჰაერი, შენი ოჯახი და ახლობელი ადამიანები დიდი დოზებით.
***
ბედნიერება დეტალებშია, მათი დანახვა კი სრულად დამოკიდებულია ადამიანის უნარზე, იყოს ბედნიერი".