7 თვის წინ დაწყებული "საუკუნის ქორწილი" კვლავ გრძელდება და ხარჯებმა მილიარდ დოლარს მიაღწია - ინდოელმა წყვილმა ამჯერად ოფიციალურად იქორწინა (ფოტო+ვიდეო) - მშობლები

ამ ქორწილმა, რომელიც უკვე რამდენიმე თვეა გრძელდება, მართლაც მსოფლიო აალაპარაკა და სამართლიანად ეწოდა "საუკუნის ქორწილი". უკვე სათვალავი აერია საზოგადოებას, რამდენი ცერემონია და წვეულება მოაწყვეს წყვილის დაქორწინების აღსანიშნავად, რამდენი ასეული მილიონი თუ უკვე მილიარდიც კი დაიხარჯა, რამდენჯერ გამოიცვალეს ძვირად ღირებული სამოსი და რომელი ვარსკვლავები სტუმრობდნენ ღონისძიებებს.

ამჯერად, 12 ივლისს, 29 წლის ანანტ ამბანიმ, აზიის უმდიდრესი ადამიანის, მილიარდერ მუკეშ ამბანის ვაჟმა და ასევე მილიარდერ ვირენ მერჩანტის ქალიშვილმა, 29 წლის რედიკა მერჩანტმა ოფიციალურად იქორწინეს.

თვეების განმავლობაში რამდენიმე ძვირად ღირებული კაბა გამოიცვალა რედიკამ, თუმცა გუშინ Abu Jani Sandeep Khosla-ს ინდური კაბა ეცვა რომელიც ხელით იყო შეკერილი, უშველებელი შლეიფი ამშვენებდა და უძვირფასესი ოჯახური სამკაულებით იყო შემკული, მათ შორის, ბრილიანტებითა და ზურმუხტებით.

ქორწინების თარიღი წყვილმა ასტროლოგების დახმარებით აარჩია. 12 ივლისს შედგა ძირითადი ცერემონია, ხოლო 13 ივლისს სტუმრები შეკრიბეს შუბხ აშირვადზე - ჯვრისწერის მსგავს რიტუალზე. დრესკოდი აქაც ინდური სამოსი იყო.

სტუმრებს ყველა ღონისძიებაზე ევალებოდათ მკაცრი დრესკოდის დაცვა - ინდურ სტილში ჩაცმა. ასე გამოცხადდნენ კიმ და ქლოე კარდაშიანები, პრიანკა ჩოპრა ქმრით, სტილისტი ლოუ როუჩი, ცნობილი ინგლისელი პოლიტიკოსები ბორის ჯონსონი და ტონი ბლერი ოჯახებით და ა.შ.

ქორწილი ამჯერად მუმბაის საგამოფენო ცენტრში შედგა, რომელიც საზეიმოდ იყო მორთული. რასაკვირველია, ინდური მუსიკისა და ცეკვების თანხლებით.

როგორც ცნობილია, წინა ღონისძიებებზე მსოფლიო ვარსკვლავები ართობდნენ სტუმრებს. მაგალითად, მარტში წინასაქორწინო წვეულებაზე რიანამ იმღერა. მაშინ სტუმრებს შორის ბილ გეიტსი და მარ ცუკერბერგიც იყვნენ. მხოლოდ ის ღონისძიება 350 მლნ დოლარზე მეტი დაჯდა.

ივნისის შუალედში ანანტა და რადიკა ათასამდე სტუმართან ერთად კრუიზში გაემართნენ ხმელთაშუა ზღვაზე, ხომალდით. ბორტზე სტუმრებისთვის მღერიდნენ Backstreet Boys-ი, რომში - დევიდ გუეტა, კანში - კეტი პერი. ახლახან კი, ივლისის დასაწყისში, ჯასტინ ბიბერს გადაუხადეს რამდენიმე მილიონი, რომ წყვილის პატივსაცემად მოწყობილ ტრადიციულ ინდურ ღონისძიებაზე ემღერა.

ანანტის მამა - მუკეშ ამბანი მსოფლიოს უმდიდრესი ადამიანების სიაში მე-11 ადგილზეა, აზიაში კი ყველაზე მდიდარი ადამიანია. ანანტი მამის კუთვნილი ერთ-ერთი უდიდესი კომპანიის მმართველია. ასევე მამის კუთვნილი ფარმაცევტული ფირმის დირექტორთა საბჭოს წევრია პატარძალი - რადიკა მერჩანტი. თუმცა მუკეშ ამბანის დინასტია ბევრად ძლევამოსილია. მუკეშის შესახებ რამდენიმე წლის წინ გაიგო მსოფლიომ, როცა საკუთარი ოჯახისთვის ყველაზე მაღალი, კერძო ცათამბჯენი ააშენა.

იხილეთ ვრცლად ამბანის დინასტიის ცათამბჯენზე, რომელიც დღესაც აოცებს მნახველს.