5 ნიშანი იმისა, რომ ქალი ქორწინებაში ბედნიერი არ არის - შეამოწმეთ, თუ თქვენ ეს გეხებათ, გამოსავალიც არსებობს - მშობლები

ქორწინება ურთიერთპატივისცემაზე, სიყვარულსა და მხარდაჭერაზე უნდა იყოს დაფუძნებული. თუმცა, ზოგჯერ, მოლოდინი რეალობას ვერ აკმაყოფილებს და წყვილები განსხვავებული მოცემულობის წინაშე აღმოჩნდებიან. ამიტომ, ზოგიერთ შემთხვევაში, შესაძლოა, ქორწინება ტკივილისა და იმედგაცრუების წყაროდ გადაიქცეს.

ფსიქოლოგებმა დაასახელეს 5 მკაფიო ნიშანი, რაც მიუთითებს იმაზე, რომ ქალი ქორწინებაში ბედნიერი არ არის და გარკვეული პრობლემები აქვს:

ნიშანი 1 - პარტნიორთან ინტელექტუალური და ემოციური კავშირის ნაკლებობა

თუ ადრე ერთმანეთს სიხარულს, გამოცდილებასა და ოცნებებს უზიარებდით და ახლა გრძნობთ, რომ თქვენს პარტნიორს ეს აღარ აინტერესებს, შინაგანად გაქვთ განცდა, რომ სალაპარაკო აღარაფერი გაქვთ და დიალოგის ყველა თემა ბავშვებზე ან ყოველდღიურ საკითხებზე საუბრით მთავრდება - ეს აშკარა სიგნალია იმისა, რომ ურთიერთობაში რაღაც ისე არ მიდის, როგორც უნდა იყო.

ნიშანი 2 - მუდმივი კონფლიქტები და უკმაყოფილება

თუ თქვენს მამაკაცში მუდმივად რაღაც არ მოგწონთ, გსურთ ყველა წვრილმანის გამო საყვედური გამოხატოთ, ხშირად ძალიან გაღიზიანებული ხართ და ემოციებს ვერ აკონტროლებთ, მაშინ, სავარაუდოდ:

ა) ან ძალიან ბევრი ილუზია დაგიგროვდათ პარტნიორთან დაკავშირებით და თქვენი მოლოდინები რეალობას არ შეესაბამება.

ბ) ან სრულად ვერ აპატიეთ მას რაიმე წყენა. ამიტომ თქვენში შინაგანი უკმაყოფილება ჩამოყალიბდა, რაც არ გაძლევთ საშუალებას, რომ აღნიშნულ ურთიერთობაში ბედნიერი იყოთ.

ნიშანი 3 - ფიზიკური სიახლოვის ნაკლებობა

აუცილებელია იმის აღნიშვნა, რომ ინტიმური ურთიერთობები მეუღლეებს შორის ჯანსაღი ურთიერთობის მნიშვნელოვანი ნაწილია. თუ თქვენს ქორწინებაში ვნება აღარ არის და თქვენი პარტნიორი ამ პრობლემის გადაჭრაზე უარს ამბობს ან ოჯახური ურთიერთობების გარეთ ეძებს კმაყოფილებას, მაშინ, რა თქმა უნდა, კავშირი თქვენთვის ბედნიერი და ჰარმონიული ვეღარ იქნება. ამ პრობლემამ შეიძლება, უარყოფითად იმოქმედოს არა მხოლოდ ურთიერთობაზე, არამედ თქვენს თვითშეფასებაზეც.

ნიშანი 4 - ურთიერთობაში მარტოობის შეგრძნება და მამაკაცის მხრიდან მხარდაჭერისა და ინტერესის ნაკლებობა

ოჯახურ ცხოვრებაში მარტოობის განცდა განსაკუთრებით მძიმე და მტკივნეულია. თუ პარტნიორთან მუდმივად თავს არასაჭიროდ გრძნობთ, თუ საუბრები ზედაპირული გახდა და თქვენი და თქვენი ოჯახის ყველა პრობლემას დამოუკიდებლად წყვეტთ, ეს იმაზე მიუთითებს, რომ თქვენი ურთიერთობა რთულ მდგომარეობაშია. მნიშვნელოვანია გვახსოვდეს, რომ ქორწინება პარტნიორობაა, კავშირი, რომელმაც უსაფრთხოების განცდა უნდა უზრუნველყოს.

ნიშანი 5 - ფსიქოლოგიური ძალადობა

თუ თქვენი პარტნიორი თქვენს გარეგნობაზე უარყოფით კომენტარებს ხშირად აკეთებს, გამცირებთ, გიკრძალავთ მეგობრებთან ან ნათესავებთან ურთიერთობას, დამოუკიდებლად და რადიკალურად წყვეტს, რა ჩაიცვათ რესტორანში, თავად გირჩევთ, იმუშაოთ თუ არა - ეს იმას ნიშნავს, რომ ძალადობრივ ურთიერთობაში ხართ. ამ შემთხვევაში მხოლოდ ერთი გამოსავალი არსებობს - მსგავს მამაკაცს აუცილებლად უნდა გაერიდოთ.

თუკი ზემოთ ჩამოთვლილ სიტუაციებში აღმოჩნდით, კარგი იქნება, ფსიქოლოგების ამ რჩევებსაც თუ გაეცნობით:

• დაუკავშირდით ფსიქოთერაპევტს, რომელიც შინაგანი ბრაზისა და წყენისაგან გათავისუფლებასა და საკუთარი თავის შეყვარებაში დაგეხმარებათ.
• დაიწყეთ საკუთარი თავისადმი ყურადღების მიქცევა: დარეგისტრირდით ცეკვის კურსზე, დაიწყეთ ახალი ენის შესწავლა, განავითარეთ ჰობი და ყოველდღიურობა გაიმრავალფეროვნეთ.
• გაეცანით ფსიქოლოგიის საფუძვლებს. ამ მიმართულებით, ცოდნის დაგროვებას შეეცადეთ.
• შეიყვარეთ თქვენი თავი, გახდით უფრო თავდაჯერებული, იზრუნეთ საკუთარ თავზე, პატივისცემა გამოხატეთ და სხვებისგანაც იმავეს მიიღებთ.