როგორ შევარჩიოთ სათამაშო შვილებისთვის - პრაქტიკული რჩევები - მშობლები

სათამაშო მხოლოდ გართობის საშუალება არ არის. ის ბავშვის განვითარებისთვის ერთ-ერთი უმნიშვნელოვანესი კომპონენტია. სწორად შერჩეული სათამაშო ხელს უწყობს პატარების ფიზიკურ, ინტელექტუალურ და ემოციურ ზრდას. თუმცა სასურველი მიზნის მისაღწევად აუცილებელია, სათამაშო სწორედ იყოს შერჩეული. ამასთანავე, სათამაშო, ისევე როგორც ბავშვის ნებისმიერი სხვა ნივთი, აუცილებლად ხარისხიანი უნდა იყოს.

ჩვენ გირჩევთ როგორ შეარჩიოთ სათამაშო, რომელიც თქვენს შვილს არა მხოლოდ გაახარებს, არამედ სარგებელსაც მოუტანს?

პირველი და უმნიშვნელოვანესი კრიტერიუმი არის ასაკის შესაბამისობა. ბავშვს განვითარებაში მის ასაკზე მორგებული სათამაშო ეხმარება. სწორედ ამიტომ ყოველთვის გადაამოწმეთ სათამაშოს რეკომენდებული ასაკი. ასაკის შესაბამისად იცვლება განვითარების ფაზები და მისთვის საინტერესო აქტივობები:

• 0-12 თვე: რბილი, ხმოვანი და მაქსიმალურად ფერადი სათამაშოები;
• 1-3 წელი: კუბიკები, მარტივი პაზლები, მუსიკალური ინსტრუმენტები;
• 3-5 წელი: როლური თამაშების ნაკრებები, ფერადი კალმები, მარტივი ლეგო;
• 5+ წელი: შემეცნებითი თამაშები, კონსტრუქტორები, მეცნიერების ნაკრებები;
• 7+ წელი: სამაგიდო თამაშები, რთული ლეგო.

ასაკის შესაბამისი სათამაშოს შერჩევას მარტივად შეძლებთ „პეპელაში“. მის ონლაინ მაღაზიაში კი პირდაპირ ასაკობრივი კატეგორიის მიხედვით შეგიძლიათ გაფილტროთ ასორტიმენტი.

ბავშვები თამაშით სწავლობენ. ამიტომ მათ ეტაპობრივად შესთავაზეთ ისეთი სათამაშოები, რომლითაც ახალ უნარებს აითვისებენ და ცოდნას მიიღებენ. ესენია: ფერები და ფორმები, ციფრები და ასოები, პრობლემის გადაჭრის უნარი (პაზლები, ლოგიკური თამაშები), სივრცითი აზროვნება (კონსტრუქტორები) და სხვა.

უსაფრთხოება სათამაშოს ხარისხის განმსაზღვრელი ერთ-ერთი მთავარი კრიტერიუმია. პირველ რიგში, ყურადღება მიაქციეთ ბრენდს და მის სერტიფიკატებს. სათამაშო, რომელსაც შვილისთვის, თქვენთვის ყველაზე მნიშვნელოვანი ადამიანისთვის ყიდულობთ, აუცილებლად უნდა იყოს სერტიფიცირებული. უსაფრთხო სათამაშო ნიშნავს, რომ მას არ აქვს ასაკისთვის შეუსაბამო წვრილი ნაწილები, ბასრი კუთხეები, ადვილად მტვრევადი დეტალები.

უსაფრთხოების მიმართულებით მნიშვნელოვანია სათამაშოების შემადგენლობის გადამოწმებაც. თუმცა ეს მარტივი ნამდვილად არ არის. სწორედ ამიტომ უნდა შეიძინოთ სერტიფიცირებული პროდუქცია, რომელიც შემადგენლობის კონტროლს თავისთავად გულისხმობს.

თამაშები, რომლებიც ხელს უწყობს ბავშვის წარმოსახვისა და ფანტაზიის განვითარებას, მას დამოუკიდებლად აზროვნების საშუალებას აძლევს. ამიტომ უპირატესობა მიანიჭეთ ხატვისა და ხელოვნების კომპლექტებს, თოჯინებს, ფიგურებსა და როლურ თამაშებს, მაგალითად, გახდი ექიმი, მშენებელი, მზარეული ტიპის ნაკრებებს. სამაგიდო თამაშები და გუნდური აქტივობები სოციალური უნარების განვითარებას უწყობს ხელს.

ნებისმიერ შემთხვევაში ეძებეთ სათამაშოები, რომლებიც ბავშვს აქტიური ჩართულობის შესაძლებლობას აძლევს. იფიქრეთ არა მხოლოდ იმაზე, თუ რისი თამაში სურს ბავშვს, არამედ იმაზეც, როგორ დაეხმარება ეს თამაში მის განვითარებას.

R