როგორი ზაფხული იქნება საქართველოში და მოსალოდნელია თუ არა სიცხეები ევროპიდან ასეთი მასშტაბის ჩვენკენ წამოვიდეს - თემაზე გადაცემაში "ახალი დღე" სინოპტიკოსი თამარ პაპაშვილი საუბრობს:
- ასეთი მასშტაბით სიცხე ჩვენკენ არ წამოვა. განსაკუთრებით ახლა, უახლოეს დღეებში. ევროპაში, ვრცელ ტერიტორიაზე მაღალი წნევის არე დამყარდა. აფრიკის ჩრდილოეთიდან ცხელი და მშრალი ჰაერის მასები წამოვიდა, რამაც ანტიციკლონური მდგომარეობა კიდევ უფრო გაამყარა. ექსტრემალურად მაღალი ტემპერატურები დაფიქსირდა ივნისსა და ივლისის დასაწყისში. რაც შეეხება საქართველოს, პირიქით, დაბალი წნევის არის გავლენის ქვეშ ვიყავით, წვიმდა, ნორმაზე დაბალი ტემპერატურები დაფიქსირდა. ახლა მდგომარეობა დასტაბილურდა. ევროპაშიც წვიმასა და ჰაერის ტემპერატურის კლებას ელოდებიან. სიცხე აღმოსავლეთით გადმოინაცვლებს. თუმცა, გაგვიმართლა. საქართველოში ასეთი მაღალი ტემპერატურები მოსალოდნელი არ არის. დაახლოებით, 1 კვირის მანძილზე ნორმასთან ახლოს და ოდნავ მაღალი ტემპერატურა, +36, +38 გრადუსის ფარგლებში გვექნება როგორც დასავლეთ, ისე აღმოსავლეთ საქართველოში. 14-დან გრილი და ნოტიო ჰაერის მასების გავრცელებას ველოდებით. მთიან და მაღალმთიან ზონებში მცირე, ხანმოკლე წვიმებია მოსალოდნელი.
კლიმატი იცვლება. თუ ევროპისთვის ივლისი იყო აქამდე ყველაზე ცხელი თვე, ვნახეთ, რომ ახლა ივნისისკენ გადმოინაცვლა. ჩვენთან, საქართველოში შესაძლოა, პირიქით, აგვისტოსკენ გადაინაცვლოს და მაღალი, ექსტრემალური ტემპერატურა უფრო გვიან მივიღოთ. რა თქმა უნდა, ყველაფერი, პირველ რიგში, კლიმატის ცვლილებასთანაა კავშირში.
კლიმატის ცვლილება ამასაც გულისხმობს, რომ პროგნოზირება საკმაოდ რთულია. თუმცა, არსებული ინფორმაციით, შეიძლება, ვთქვათ, რომ ივლისისა და აგვისტოს თვეებში საქართველოში ნორმაზე 1-2 გრადუსით მაღალი იქნება, ნალექები კი ნორმაზე ნაკლები. თუმცა, ეს არ ნიშნავს, რომ ძალიან ხანგრძლივი პერიოდის მანძილზე უმეტესად უნალექო ამინდი გვექნება.
ახლა ზღვაზე წასვლის ძალიან კარგი დროა. მაღალი ტემპერატურაც მოსალოდნელია და ნალექებიც არ იქნება. რაც შეეხება მთიან და მაღალმთიან ზონას, იქ დროგამოშვებით იწვიმებს.
-პირველ რიგში, აღსანიშნავია, რომ ძალიან რთული გეოგრაფიული რეგიონია. შემიძლია, ვთქვა, რომ მთელი მსოფლიოს მასშტაბით საქართველო ურთულესი საპროგნოზო რეგიონია იმიტომ, რომ მთები, ზღვა, მაღალი მთები - ასეთი მრავალფეროვანი რელიეფი თავისთავად ძალიან რთულ სინოპტიკურ სიტუაციას ქმნის. ამიტომ, საქართველოსთვის გრძელვადიანი პროგნოზის განსაზღვრა მართლა ძალიან რთულია. თუმცა, ახლა მსოფლიოს საშუალოვადიანი პროგნოზირების წევრები ვართ. ბევრი წვდომა გვაქვს ახალ და მნიშვნელოვან პროდუქტთან და იმედი გვაქვს, რომ მოკლე დროში მაღალგამართვიანობას მივუახლოვდებით.
გარემოს ეროვნული სააგენტოს ამინდის გრძელვადიანი პროგნოზების განყოფილების უფროსი, ხათუნა ქოქოსაძე მიმდინარე დღეებისა და ივლისის თვის ზოგადი პროგნოზის შესახებ გვესაუბრება:
-ზაფხულში საქართველოში ტემპერატურა საშუალო მრავალწლიურ მნიშვნელობასთან შედარებით, 1-2 გრადუსით მაღალი იქნება. ნალექები ნორმაზე ნაკლებია მოსალოდნელი. ივლისის თვეშიც ტემპერატურა, კლიმატურ ნორმასთან შედარებით, 1-2 გრადუსით მაღალი იქნება. თვის საშუალო ტემპერატურა შავი ზღვის სანაპიროზე, კოლხეთის დაბლობზე, აღმოსავლეთ საქართველოს ბარში +23, +27 გრადუსის ფარგლებშია მოსალოდნელი, რაც საშუალო მრავალწლიურ მნიშვნელობაზე 1-2 გრადუსით მაღალია. ცალკეულ დღეებში შესაძლებელია, სანაპიროზე ტემპერატურის მომატება +34, +37 გრადუსამდე, კოლხეთის დაბლობზე +37, +40 გრადუსამდე დაფიქსირდეს. აღმოსავლეთში, ქართლის ვაკეზე +37, +40, კახეთში +38, +41, მთიან რაიონებში შესაძლებელია, ცალკეულ დღეებში ტემპერატურამ +33, +38 გრადუსამდე მოიმატოს, მაღალ მთაში კი +31, +34 გრადუსამდე. ნალექები ივლისში ნორმაზე ნაკლები იქნება.
მიმდინარე დღეებში, კვირის ბოლომდე უნალექო ამინდი შენარჩუნდება. ტემპერატურა დასავლეთ საქართველოში +37 გრადუსამდე, აღმოსავლეთ საქართველოში +39 გრადუსამდე მოიმატებს. მომდევნო კვირის დასაწყისში კვლავ მაღალი ტემპერატურა შენარჩუნდება. შემდეგ ცოტათი დაიკლებს იმიტომ, რომ 15 ივლისს როგორც დასავლეთ, ასევე აღმოსავლეთ საქართველოში მცირე, ხანმოკლე წვიმაა მოსალოდნელი. შესაძლოა, ტემპერატურამ +30, +35 გრადუსამდე დაიკლოს. 17 ივლისიდან ისევ უნალექო ამინდია მოსალოდნელი. 16-ში კი ღრუბლიანი ამინდია ნავარაუდევი. შესაძლოა, ზოგან მცირე, ხანმოკლე ხასიათის წვიმა აღინიშნოს. 17-დან, როგორც აღვნიშნე, ისევ უნალექო ამინდია მოსალოდნელი.
თბილისში მიმდინარე დღეების განმავლობაში უმეტესად უნალექო ამინდია მოსალოდნელი. 15 ივლისის დღის ბოლოსა და 16 ივლისის ღამის საათებში შესაძლებელია, ხანმოკლე წვიმა ელჭექით აღინიშნოს. 15-ში ტემპერატურა შედარებით დაბალია. დაახლოებით, +34 გრადუსამდე იქნება. 16-დან კვლავ მოიმატებს და კვირის ბოლომდე +37, +38 გრადუსამდე იქნება.