ბავშვის ეჭვიანობა ჩნდება მაშინ, როდესაც ფიქრობს, რომ მისი მშობლები უფრო მეტ ყურადღებას უთმობენ მეორე შვილს. ისინი სხვადასხვა გზით ცდილობენ, გამოხატონ უკმაყოფილება. მეტაფორულად უფროსი ბავშვის ეს რეაქცია შედარებულია "სამეფო ტახტიდან ჩამოგდებასთან". რაც შეეხება ნიშნებს, თუ როგორ გავიგოთ, რომ ბავშვი ეჭვიანობს, შემდეგია:

• უნარების რეგრესი - ბავშვი იწყებს უმცროსი დედმამიშვილივით მოქცევას, იწყებს მასავით საუბარს, ხელში აყვანას, იავნანაზე დაძინებას, საწოვარა ბოთლით საჭმლის მიღებას და ა.შ.
• სტრესის ნიშნები - ძილის რეჟიმის დარღვევა, მადის დაქვეითება, ნევროლოგიური დარღვევები (ტიკები, ენის ბორძიკი), ფსიქოსომატური დაავადებები.
• აგრესია უმცროსი ბავშვის მიმართ
  (არ დატოვოთ ოთახში მარტონი).
• ჩაკეტილობა, დეპრესია, ქცევის გაუარესება, ტანტრუმები.

ბავშვი, რომლის განცდებიც დროულად ვერ შეამჩნიეს და ვერ მიიღო ნუგეში, იქცევა სასტიკ და ცინიკურ ზრდასრულად, რომელმაც არ იცის თანაგრძნობის და მოწყალების უნარი, უვითარდება დაბალი თვითშეფასება და არაჯანსაღი პირადი ურთიერთობები ზრდასრულობაში. ამიტომ ძალიან მნიშვნელოვანია, მშობლებმა მალე შენიშნონ, სწორი შეფასება მისცენ ვითრებას და ყველანაირად სცადონ მდგომარეობის გამოსწორება - თუ საჭირო გახდა, სპეციალისტის ჩარევითაც.

რეკომენდაციები მშობლებს, როცა უფროსი შვილი უმცროსზე ეჭვიანობს და როგორ შევამზადოთ ბავშვი მომავალი და/ძმისთვის:

• თუკი შენიშნავთ ეჭვიანობას, არ დახუჭოთ ამაზე თვალი დაუთმეთ თითოეულ შვილს კონკრეტული დრო. უმცროსი ცოტა ხნით სხვა ოჯახის წევრმა გადაიბაროს, მანამდე კი თქვენ უფროსთან ერთად დაკავდით რამე აქტივობით.
• არ მისცეთ უმცროს შვილს უფროსის სათამაშოები მისი ნებართვის გარეშე.
• არ შეადაროთ ერთმანეთს, იამაყეთ ორივეს წარმატებით.
• თანაბრად გაყავით სიყვარული და ყურადღება ყველა შვილზე, ასაკის მიუხედავად.
• ჩხუბისას არ დაიჭიროთ უმცროსის მხარე, მხოლოდ იმიტომ, რომ პატარაა.
• აგრესია ჩაახშეთ მომენტალურად, აუხსენით ორივეს, თუ რას ნიშნავს ერთი ოჯახი.
• ხშირად გაატარეთ დრო მთელმა ოჯახმა ერთად.

შემზადება ახალი წევრისთვის:

• თავიდანვე გააგებინეთ ახალი და/ძმის ყოლი ამბავი.
• ესაუბრეთ დედმამიშვილის ყოლის მშვენიერებაზე.
• მუცელში ყოფნისას დაამყარებინეთ უფროს შვილს მასთან კონტაქტი - ხელით იგრძნოს მისი მოძრაობა, მოუყვეს ზღაპრები, უმღეროს.
• წარმოიდგინეთ მომავალი ბავშვი ერთად, აღწერეთ, როგორი შეიძლება იყოს.
• ჩვილისთვის საჭირო ნივთები აარჩიეთ და იყიდეთ ერთად, ჰკითხეთ რჩევები უფროს შვილს და გაითვალისწინეთ მისი აზრი.
• აუხსენით თუ რამხელა პასუხისმგებლობაა უფროსი დობა ან ძმობა.
• ასწავლეთ ჩვილთან მოქცევის წესები.
• არ გახადოთ უფროსი შვილი ძიძა, დაიხმარეთ მხოლოდ მაშინ, როცა ამას თავად შემოგთავაზებთ.
• არ უთხრათ უარი ჩვილის ხელში დაკავებაზე, თუმცა დაიცავით უსაფრთხოება.
• აგრძნობინეთ მისი უდიდესი როლი და მნიშვნელობა უმცროსი დის ან ძმის ცხოვრებაში.
• არ გაუშვათ უფროსი შვილი ბებიასთან საცხოვრებლად! ის თავს იგრძნობს მიგდებულად და უსარგებლოდ.

ფსიქოლოგი ანა ცირიკიძე