მარილის ჩაყრასაც თავისი დრო აქვს ახალბედა დედას, რომელსაც მზარეულობის ძალიან მცირე გამოცდილება აქვს, წვნიანი არც ისე გემრიელი გამოსდის. ხან ბოსტნეული მოგვდის ბევრი და წვენი ცოტა, ხან ზედმეტი ბრინჯით ვასქელებთ, ხან პირიქით, ზედმეტად გაწყალებული გამოდის... ერთი სიტყვით, კარგი წვნიანი მხოლოდ გამოცდილი ხელის ქმნილებაა. სამაგიეროდ, შეგიძლიათ გაეცნოთ მისი მომზადების მთავარ საიდუმლოებებს.
1. პირველ რიგში, სწორად შეარჩიეთ წვნიანში გამოსაყენებელი ხორცის ნაჭრები. ძროხის ხორცისგან წვნიანისთვის ყველაზე შესაფერისია - ბეჭი, ჩალაღაჯი, კუდუსუნი, ხერხემალი. ღორისგან - ბეჭი, კანჭი, ჩლიქები.
2. წვნიანში სითხის რაოდენობა ზუსტად უნდა განსაზღვროთ. ქვაბში იმდენი თეფში წყალი ჩაასხით, რამდენი პორციაც გსურთ, რომ მოამზადოთ. თუ ძალიან თხელი მოგეჩვენათ, არ შეშინდეთ, ზედმეტ სითხეს დუღილისას დაიშრობს.
3. რომ არ ჩაიხარშოს და არ ჩასქელდეს, თვალი ადევნეთ ცეცხლს. ადუღებამდე ქვაბი ძლიერ ცეცხლზე უნდა იდგას, ადუღების შემდეგ კი - დაბალზე.
4. ბოსტნეულსა და ბურღულეულს წვნიანში მათი ხარშვისთვის საჭირო დროის გათვალისწინებით ვყრით: ლობიო (წინასწარ დამბალი) - 50-60 წთ. ბრინჯი - 30 წთ. კომბოსტო - 20-30 წთ. კარტოფილი - 20-25 წთ. ვერმიშელი - 10-15 წთ. სტაფილო - 10-12 წთ.
5. თუ სუპ-პიურეს ამზადებთ, ბევრი ბოსტნეული და მწვანილი არ არის საჭირო.
6. მარილის ჩაყრასაც თავისი დრო აქვს. ბოსტნეულის სუპები თავიდანვე უნდა შევაზავოთ მარილით, ხორციანები კი მომზადებამდე 3-5 წუთით ადრე. თუ დაგიმლაშდათ, მარლაში ცოტა ბრინჯი ჩაყარეთ, განასკვეთ და წვნიანში ჩაუშვით. ზედმეტ მარილს შეიწოვს.
7. წვნიანს ცეცხლიდან გადმოდგმისთანავე ნუშეექცევით. დააცადეთ, ოდნავ ქვაბშივე გაგრილდეს. სანელებლები უფრო არომატული გახდება, თანაბრად განაწილდება და კერძი ბევრად გემრიელი მოგეჩვენებათ.