გუშინ გამოცდების ეროვნულმა ცენტრმა აბიტურიენტებისათვის ერთიანი ეროვნული გამოცდების შედეგების გამოქვეყნება ზოგადი უნარებით დაიწყო. ცნობილია, რომ ზღვარი აბიტურიენტთა თითქმის 13 %-მა ვერ გადალახა. აქვს თუ არა აზრი უნარების ქულის გასაჩივრებას, როგორ გამოითვლება გრანტი და აქვს თუ არა აზრი გრანტისთვის დამატებითი საგნების ჩაბარებას - ამ და სხვა აქტუალურ კითხვებზე გამოცდების ეროვნული ცენტრიდან გვპასუხობენ:
- უნარების ნაწილი მთლიანად კომპიუტერულად სწორდება და ტექნიკური აპელაციის გარდა, ფაქტობრივად, სხვა სახის აპელაცია არ ეხება. ამიტომ უნარების ქულის გასაჩივრებას, პრაქტიკულად, არ აქვს. ერთდაერთი აქ შეიძლება იყოს მხოლოდ ტექნიკური ტიპის პრობლემა, მაგალითად, ხ ნიშანი მონიშვნისას კარგად არ გამოჩნდეს. შემთხვევები გვქონია, რომ მართლაც იყო ტექნიკური შეცდომა, შემოუტანიათ აბიტურიენტებს განცხადება და მათი მოთხოვნა დაუკმაყოფილებიათ.
- აბიტურიენტების ნაწილს კითხვის ნიშნები აქვს ცალკეული ვარიანტების კითხვებთან და საუბრობენ, რომ პასუხი არასწორია. თუ შეიძლება, მსგავსი ფაქტი რომ მოხდეს?
- მათ შეუძლიათ დარეკონ ცხელ ხაზზე და ოპერატორებს გაესაუბრონ. გარდა ამისა, აპელაცია იქნება, განცხადებას შემოიტანენ და მიხვდებიან, რომ ყველაფერი სწორად არის.
- კიდევ ერთხელ განვმარტოთ, რა განსხვავებაა ნედლ ქულასა და სკალირებულ ქულას შორის?
- ნედლი ქულა არის პირველადი ქულა ანუ ის ქულა, რომელიც მიიღო აბიტურიენტმა. სკალირებული ქულა ეს არის აბსოლუტური ქულა. თუ გამოცდას სჭირდება რამდენიმე ტიპის ტესტი, შესაძლებელია ეს ტესტები სირთულის თვალსაზრისით აბიტურიენტებისათვის ერთმანეთისგან განსხვავდებოდეს. ტესტი თანაბარი სირთულისაა, მაგრამ აღმოჩნდება ხოლმე, რომ რომელიღაც ვარიანტის დაწერა უფრო მეტად გაუჭირდათ აბიტურიენტებს. ამიტომ, არსებობს გათანაბრების პრინციპი, რომ ისინი თანაბარ პირობებში ჩავაყენოთ. ეს ნიშნავს იმას, რომ ტესტების სითულე ერთ სკალაზე თავსდება და ამიტომ არის ხოლმე, რომ რომელიღაც ვარიანტში ზღვარი დაბლა იწევს.
- იმისათვის, რომ აბიტურიენტმა განაგრძოს კონკურსში მონაწილეობა, ზღვარი ნედლი ქულით უნდა გადალახოს თუ სკალირებისას მომატებული ქულაც ითვლება?
- არა, ბარიერი აუცილებლად ნედლი ქულით უნდა გადალახოს. წინააღმდეგ შემთხვევაში, ეთიშება კონკურსს.
- როგორ გამოითვლება გრანტი?
- ზოგადი უნარების ქულა მრავლდება 1,5-ზე. შემდეგ იკრიბება ყველა საგნის ქულა და მრავლდება 10-ზე. ეს არის აბიტურიენტის საგრანტო ქულა, შემდეგ ადარებს იმ ცხრილს, რომელსაც ჩვენ გამოვაქვეყნებთ.
- გრანტისთვის რაიმე მნიშვნელობა აქვს ორი დამატებითი საგნის ჩაბარებას?
- დამატებითი საგნის ქულები არ იკრიბება, ცალ-ცალკე განიხილება. უბრალოდ ამ შემთხვევაში, აბიტურიენტებს არჩევანის უფრო მეტი საშუალება აქვთ. რომელ არჩევით საგანშიც უკეთესი შედეგი ექნებათ, ის განსაზღვრავს დაფინანსებას.
- ჩარიცხვების გამოქვეყნებას როდიდან უნდა ელოდნენ აბიტურიენტები?
- აგვისტოს ბოლოდან გამოქვეყნდება.
თამარ იაკობაშვილი