დღეს მედიაში გავრცელდა ინფორმაცია, რომ მე-11 და მე-12 კლასის წარჩინებული მოსწავლეები ადგილობრივი თვითმმართველობებისგან სემესტრულად ფულად ჯილდოს, 250 ლარს მიიღებენ. ბევრ ადამიანს გაუჩნდა შეკითხვა, რა გზით უნდა მოიპოვოს მოსწავლემ ეს დაფინანსება, რომელი მუნიციპალიტეტები არიან პროგრამაში ჩართულნი და თბილისელ მოსწავლეებს ექნებათ თუ არა იგივე შანსი.
აღნიშნულ პროექტს ამ დროისთვის მცხეთის მუნიციპალიტეტი ახორციელებს. მუნიციპალიტეტში გვითხრეს, რომ პროექტი სოციალური პაკეტიდან დამოუკიდებლად იმუშავებს, თუმცა საბოლოო დადგენილების დამტკიცებული ვარიანტი ჯერ არ მიუღიათ. მათივე თქმით, ეს არის მუნიციპალიტეტის გადაწყვეტილება, რომ იქ მცხოვრები წარჩინებული მოსწავლეები წაახალისონ.
"ეს არის სემესტრული წახალისება, მე-11 და მე-12 კლასის მოსწავლეებისათვის. 250 ლარის ოდენობით. იმისათვის, რომ მოსწავლეს ფულადი ჯილდო გადაეცეს, მისი სემესტრული ქულა (დამრგვალების გარეშე) უნდა იყოს 9,8-დან 10-მდე, თან უნდა იყოს წარმოდგენილი ნიშნების ფურცელი და დირექტორის სპეციალური წერილი"- გვითხრეს მცხეთის მუნიციპალიტეტის მერიაში.
საკითხზე განათლების, მეცნიერების, კულტურისა და სპორტის სამინისტროს მივმართეთ და ვკითხეთ, სხვა მუნიციპალიტეტებშიც ან თბილისში თუ იგეგმება მსგავსი პროგრამა, სადაც გვითხრეს:
"ეს არის კონკრეტული მუნიცპალიტეტის ინიციატივა და გადაწყვეტილება, განათლების სამინისტრო პროგრამაში ჩართული არ არის."
თამარ იაკობაშვილი