რომელი კლასებისთვის ხდება ჭადრაკის სწავლება სავალდებულო და ვინ უნდა ასწავლოს ეს საგანი - განმარტება სამინისტროდან
რომელი კლასებისთვის ხდება ჭადრაკის სწავლება სავალდებულო და ვინ უნდა ასწავლოს ეს საგანი - განმარტება სამინისტროდან


საქართველოს განათლებისა და მეცნიერების მინისტრის, მიხეილ ჩხენკელის გადაწყვეტილებით, მოსწავლეები ჭადრაკს პირველ კლასში სავალდებულო საგნად შეისწავლიან. ამის შესახებ ინფორმაციას განათლებისა და მეცნიერების სამინისტრო აქვეყნებს.

"მოსწავლეებში ანალიტიკური, ლოგიკური, კრიტიკული აზროვნებისა და პრობლემების პრაქტიკული გადაჭრის უნარ-ჩვევების განვითარების მიზნით, ჭადრაკი ზოგადი განათლების დაწყებითი საფეხურის პირველ კლასში სავალდებულო საგნად ემატება.
სავალდებულო საგნად ჭადრაკის შესწავლა 2022-2023 წლის სექტემბრიდან იგეგმება, მანამდე კი ჭადრაკის ეროვნულ ფედერაციასთან თანამშრომლობით აქტიურად მიმდინარეობს მოსამზადებელი სამუშაოები, მასწავლებლების ტრენინგების ორგანიზებისა და სასწავლო რესურსების მომზადების კუთხით.

ჭადრაკი აუმჯობესებს მოსწავლეთა მრავალმხრივ უნარებს, როგორებიცაა: ყურადღება, კონცენტრირება, მეხსიერება,
ანალიზი, ლოგიკა, გადაწყვეტილების მიღება, სივრცეში
ორიენტირება და სხვა. ეს კი, პირდაპირ კავშირშია მათემატიკისა და სხვა საგნების სტანდარტებით განსაზღვრულ კომპეტენციებთან.
აღსანიშნავია, რომ სკოლებში ჭადრაკის სწავლება გათვალისწინებულია ევროკავშირის 2012 წლის დეკლარაციით, რომელიც საგანმანათლებლო სისტემებში ჭადრაკის სწავლების დანერგვას ითვალისწინებს." - აღნიშნულია განათლებისა და მეცნიერების სამინისტრო მიერ გავრცელებულ ინფორმაციაში.

სამინისტროში გადავამოწმეთ, ეს საგანი დამოუკიდებლად ისწავლება თუ სპორტის ფარგლებში სწავლებას გულისხმობს:

"ჭადრაკის სწავლება სპორტის ფარგლებში არ იგულისხმება, ცალკე საგნად გაიხსნება, პედაგოგებიც გადამზადდებიან და ამ სწავლებას დაიწყებენ. ახლა ამაზე მუშაობა მიმდინარეობს და პერიოდულად, სიახლეების შესახებ ცნობილი გახდება."- გვითხრეს სამინისტროში.

თამარ იაკობაშვილი


1710
ბეჭდვა
მოგვწერეთ თქვენი შეკითხვები და მოსაზრებები
კომენტარები (0)
კომენტარი ჯერ არ გაკეთებულა
ასევე დაგაინტერესებთ
მსგავსი სიახლეები