"ყურადღებით იყავით, რომ არ გამოგეპაროთ შემდეგი სიმპტომები... ძირითადი გართულებაა გულის მხრივ" - საფრანგეთში მოღვაწე ქართველი პედიატრის გაფრთხილება მშობლებს
"ყურადღებით იყავით, რომ არ გამოგეპაროთ შემდეგი სიმპტომები...  ძირითადი გართულებაა გულის მხრივ" - საფრანგეთში მოღვაწე ქართველი პედიატრის გაფრთხილება მშობლებს
საფრანგეთში მოღვაწე ქართველი პედიატრი, ქეთი ლობჟანიძე ბავშვებში ბოლო დროს გამოვლენილ საშიშ სინდრომზე საუბრობს, რომელსაც თავის პრაქტიკაში უკვე შეხვდა. ეს სინდრომი იმათაა საყურადღებო, რომ კოვიდგადატანილ ბავშვებში გამოვლინდა. დიახ, იმ ბავშვებში, რომლებმა კორონავირუსი მსუბუქად გადაიტანეს. საქართველოშიც ბევრმა ბავშვმა გადაიტანა იგივე ინფექცია, ამიტომ ქალბატონი ქეთის გაფრთხილება ქართველი მშობლებისთვისაც ყურადსაღებია:
"კოვიდ-კავაზაკით დაპანიკებულები მწერენ ინბოქსში. მშობლების ინფორმირებისთვის შემოვიხედე დროებით...
როგორც მოსალოდნელი იყო, უცნობი ვირუსი ისევ აგრძელებს სურპრიზებს, აქამდე პედიატრები მშვიდად რომ ვიყავით, ვიცოდით, ბავშვებში ასიმპტომურად ან მსუბუქი სიმპტომებით მიდის ინფექცია, ხუთი კვირის უკან გამოჩნდა ეს ფენომენი-
კოვიდ-19ის მსუბუქი ან ასიმპტომური ფორმის გადატანის მერე ბავშვების ნაწილს განუვითარდა ანთებითი რეაქცია ინფექციურ აგენტზე კავაზაკის მსგავსი სინდრომით (და არა კავაზაკის დაავადება) და თანმდევი სიცოცხლისთვის საშიში გართულებებით, რომლის მკურნალობა შეიძლება დროული ჰოსპიტალიზაციით, ლეტალური გამოსავალი ძალიან იშვიათია. ნუ დაისტრესებით, ყურადღებით იყავით, რომ არ გამოგეპაროთ შემდეგი სიმპტომები:

  1. გახანგრძლივებული ცხელება;
  2. კუჭ-ნაწლავის მხრივ: გულისრევა, მუცლის ტკივილი (ზოგჯერ აპენდიკულური სინდრომის მსგავსი), ღებინება, დიარეა;
  3. კანის სიმპტომატიკა, გამონაყარი შეიძლება იყოს კავაზაკისთვის სპეციფიური და არასპეციფიურიც;
  4. ფარინგიტი, "ჟოლოსებრი" ენა;
  5. კონუნქტივიტი;
  6. კისრის ადენოპათია;
  7. თავის ტკივილი;
  8. სხვა რესპირაციული სიმპტომებიც ერთვება ზოგჯერ.

ძირითადი გართულებაა გულის მხრივ- მიოკარდიტი, პერიკარდიტი, კორონალური სისხლძარღვების დაზიანება, რის გამოსარიცხადაც დამახასიათებელი სიმპტომებისა და სისხლში ანთებითი სინდრომის არსებობისას კეთდება გულის ექოსკოპია.

რაც მთავარია, მკურნალობას ექვემდებარება, თქვენგან საჭიროა სიფრთხილე, სიმპტომები რომ არ გამოგეპაროთ და დროული ჰოსპიტალიზაცია.

პ.ს. არ მიყვარს წამოძახება "ხომ გეუბნებოდით", ყოველთვის ცუდად და ნიშნისმოგებასავით ჟღერს და ამ კონტექსტში ეს სიმდაბლე და სისასტიკეა, მაგრამ როცა ამდენ ადამიანს ისევ არ სჯერა ვირუსის არსებობა, ეპიდემიის საფრთხე და არაექიმების ზღაპრებს უფრო იზიარებს, ექიმები კი მტრებად შეგვრაცხა, უნდა ითქვას- ხომ გეუბნებოდით, უცნობ ვირუსთან გარისკვა დაუშვებელია, სიფრთხილე არასდროსაა ზედმეტი!

პ.პ.ს. საფრანგეთი ისევ შეცდა, შეზღუდვების მოხსნა ბავშვებით რომ დაიწყო, რასაც ასევე ვამბობდი!" - წერს ქეთი ლობჟანიძე.
1098
ბეჭდვა
მოგვწერეთ თქვენი შეკითხვები და მოსაზრებები
კომენტარები (0)
კომენტარი ჯერ არ გაკეთებულა
მსგავსი სიახლეები

გამოკითხვა
რომელია თქვენი ბავშვის საყვარელი მულტფილმი?