კოვიდზე ტესტირებისთვის ექიმის მიმართვა აუცილებელი აღარ არის: "მივიდნენ თვითდინებით, რომ აქვთ სიმპტომები და ჩაუტარდებათ უფასოდ"
დღეს საკოორდინაციო საბჭოს სხდომის შემდეგ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ მედიისთვის კომენტარი გააკეთა და ეპიდსიტუაცია შეაფასა. მან ასევე დაასახელა ის პროგნოზები, რაც შემზღუდველი ღონისძიებების პარალელურად არსებობს და ინფიცირების მაჩვენებელზე გავლენას მოახდენს:

- საქართველოში დღეს კორონავირუსის 2501 ახალი შემთხვევა გვაქვს. არ უნდა ჩავთვალოთ, რომ ახალი შემთხვევების რიცხვი განახევრებულია და პარასკევთან და შაბათთან მიმართებაში, უფრო ქვემოთაა. ეს ძირითადად განპირობებულია იმით, რომ ტესტირების რაოდენობა შაბათ-კვირას მცირდება. როგორც გახსოვთ, პარასკევს დღიურად ჩატარებული ტესტირების მაქსიმუმი გვქონდა, 18 ათასზე ოდნავ მეტი.
შაბათს 15 ათასამდე, ხოლო გუშინ 10 ათასამდე იყო. ეს შაბათ-კვირის ჩვეულებრივი ფენომენია. როცა მხოლოდ PCR-ზე ვიყავით, მაშინაც კვირაობით 4-5 ათასი ტესტი კეთდებოდა, შემდეგ დღეებში კი ეს მაჩვენებელი იმატებდა. მოგეხსენებათ, რომ სამიზნე გვაქვს, ამ კვირის განმავლობაში ყოველდღიურად 20 ათას ტესტზე გავიდეთ ანუ მაქსიმალურად გავაფართოვოთ PCR ტესტირება, ასევე ანტიგენზე დამყარებული ტესტები. ძირითადი მიზანი გახლავთ, რომ ადრეულ ეტაპზე გამოვავლინოთ ინფიცირებულები და მათ იზოლირების შესახებ მივცეთ რეკომენდაცია, რომ თავიდან ავიცილოთ ინფექციის შემდგომი გავრცელება. ამიტომ, კიდევ ერთხელ მივმართავ მოსახლეობას და გთხოვთ, მიუხედავად იმისა, რომ შაბათ-კვირას ვთხოვეთ, ყველა პოლიკლინიკაში, ყველა იმ დაწესებულებაში, სადაც ამბულატორულ პირობებში შესაძლებელი იყო ტესტირების ჩატარება, მაინც შედარებით ნაკლები ნაკადი იყო. ამიტომ, ძალიან გთხოვთ, ამას დიდი მნიშვნელობა აქვს,
რომ შეზღუდვების პირობებში მაქსიმალურად გავაფართოვოთ გამოვლენის მაჩვენებელი, რომელმაც შეიძლება იმოქმედოს და ოდნავ მეტი გვქონდეს ინფიცირებულთა რაოდენობა. Health Metrics-ის გვერდზე საქართველოზე გამოქვეყნებული მასალები შეგიძლიათ ნახოთ. იქ არის დაახლოებითი პროგნოზირება, რომ ჩვენ პიკში ვართ. თუ ყველა შევასრულებთ იმ რეკომენდაციებს, რაც დღეს დადგენილია, ამ სამი კვირის განმავლობაში, განსაკუთრებით პირბადის ტარების მაჩვენებელს, რომელიც ცოტა ზემოთ , 55-დან 65 პროცენტზე ავწიეთ, და ავიყვანთ მაქსიმუმზე, მაქსიმუმი კი 95 პროცენტია, ამ თვის ბოლოს ჩვენ შეიძლება ახალ შემთხვევათა რიცხვი გავანახევროთ და კლების სერიოზული ტენდენცია შეიქმნას ქვეყანაში. ხოლო აპრილისთვის ეს მაჩვენებელი ჩამოვიდეს დღიურად 200-ის ფარგლებში, რაც ძალიან მნიშნელოვანი იქნება ადამიანების ჯანმრთელობისთვის. კიდევ ერთხელ მივმართავ მოსახლეობას, ისარგებლონ შემოთავაზებით, დღეს ქვეყნის დაახლოებით 200-ზე მეტ ადგილზეა ტესტირება ხელმისაწვდომი. მხედველობაში მაქვს ანტიგენის ტესტირება. ყველა სტაციონარში სტაციონარიზირებული ავადმყოფისთვის და ასევე, თბილისში დაახლოებით 42 ამბულატორულ დაწესებულებაში და მთელი საქათველოს მასშტაბით დაახლოებით 150-ზე მეტ სამედიცინო დაწესებულებაში ხელმისაწვდომია და ხაზგასმით ვამბობ, რომ ეს უფასოა. სიმპტომებიან ადამიანებს შეუძლიათ მიმართონ როგორც ექიმის დანიშნულებით, ისე ექიმის დანიშნულების გარეშე. მივიდნენ ე.წ. თვითდინებით, რომ აქვთ სიმპტომები და უნდა ჩაუტარდეთ უფასოდ. ამ ყველაფერს სახელმწიფო აფინანსებს. როგორც მოგეხსენებათ, ანტიგენის ტესტზე პასუხი 15-20 წუთშია. იტვირთება შესაბამის პორტალზე, თუ საჭიროა PCR ტესტის ჩატარება, პასუხი 24-48 საათშია. მაღლა მიდის გამოჯანმრთელების მაჩვენებელი. 137 499 ადამიანი გამოჯანმრთელდა კოვიდისგან. დღეს კი, სამწუხაროდ, 36 ადამიანი გარდაიცვალა.

- ამ კვირის ბოლოს უკვე მთავრდება 2-კვირიანი ეტაპი, რაც შეზღუდვები ამოქმედდა. რა მოლოდინები გაქვთ, რა მონაცემები გვექნება კვირის ბოლოს, შემზღუდველი ღონისძიებების გათვალისწინებით?

- შემზღუდველი ღონისძიებების გათვალისწინებით, მოლოდინი მაქვს, რომ დიდი ზრდა არ უნდა გვქონდეს ამ კვირის ბოლოს. გარკვეულად, სტაბილიზაციისკენ უნდა წავიდეს ზრდის მაჩვენებელი. დღეს შემცირება რეალურად გვაქვს, მაგრამ, როგორც გითხარით, ეს შემცირება ძირითადად იმის ხარჯზეა, რომ გუშინ, 24 საათში გაკეთდა 10 ათასამდე ტესტი. თუ ჩვენ 20 ათასამდე ტესტი გვექნება, გამოვლენა მაშინ მეტი იქნება. მაგრამ, როცა გამოვლენა გაიზრდება, ზრდა ძირითადად მსუბუქი და უსიმპტომო პაციენტების ხარჯზე და სწორედ მათი იზოლირება, იქნება ეს ბინაზე თუ კოვიდსასტუმროებში, გარკვეულად ჯაჭვის შემსუბუქების საშუალებას მოგვცემს.

- თქვით, რომ უკვე პიკში ვარ და თუ შეზღუდვებს გავითვალისწინებთ და იმ რეკომენდაციებს, რომლებიც გაცემულია, მაშინ თვის ბოლოს უკვე უნდა ველოდოთ დაღმასვლას? ასევე, ვიცით, რომ თვის ბოლოსკენ გარკვეული რეგულაციები მსუბუქდება, რამდენად შეიძლება ეს საზიანო იყოს, ინფიცირების თვალსაზრისით?

- რა თქმა უნდა, ნებისმიერი მობილობის გაზრდა, ხელს უწყობს ინფიცირების მაჩვენებლის ზრდას. ამიტომ, დეკემბრის სამი კვირის განმავლობაში უნდა დავაკვირდეთ ეპიდსიტუაციის მიმდინარეობას, განვითარებას და იმის მიხედვით უნდა მიიღოს საკოორდინაციო საბჭომ გადაწყვეტილებები. ყველაფერი ეპიდსიტუაციაზეა დამოკიდებული, თუ გაგვიუარესდა, შეზღუდვები უნდა გამკაცრდეს. თუ დავიცავთ ყველაფერს და ციფრები ჯერ სტაბილიზაციისკენ და მერე შემცირებისკენ წავა, მაშინ შეიძლება გარკვეულ შემსუბუქებაზე მსჯელობა.

- გრიპის ვირუსი ხომ არ დაფიქსირებულა ქვეყანაში?

- ჯერჯერობით, გრიპის ვირუსის ცირკულაცია არ დაფიქსირებულა და ამიტომ, კიდევ ერთხელ ვსარგებლობ შემთხვევით, გრიპის ვაქცინა საკმაო რაოდენობითაა ქვეყანაში. მოვხსენით ბარიერი. ყველას შეუძლია პოლიკლინიკებში მივიდეს და აიცრას. ჯერ კიდევ არის ამის დრო. საკმარისი რაოდენობითაა, დაახლოებით 60-65 ათასამდე დოზა და გთხოვთ ისარგებლეთ იმ შემოთავაზებით, რაც წელს სახელმწიფომ გააკეთა. 235 ათასი დოზა შევიძინეთ. მასწავლებლებს ვთხოვეთ, რომ აიცრან, ასევე 65 წელს ზემოთ ყველა ადამიანმა და კიდევ ერთხელ მოვუწოდებ ორსულ ქალბატონებს, მათთვის მთელ სეზონზე იქნება გარკვეული რაოდენობა შენახული. სასურველია, რომ ყველა ორსული ქალბატონი აცრილი იყოს.

2252
ბეჭდვა
მოგვწერეთ თქვენი შეკითხვები და მოსაზრებები
კომენტარები (0)
კომენტარი ჯერ არ გაკეთებულა
მსგავსი სიახლეები