"ძაღლებისა და კატების სხეულზე სასარგებლო ბაქტერიებია, რომლებთან კონტაქტიც ბავშვს უძლიერებს იმუნიტეტს... ამ ბავშვებს ჯანმრთელობის ნაკლები პრობლემები აქვთ" - პედიატრის განმარტებები
"ძაღლებისა და კატების სხეულზე სასარგებლო ბაქტერიებია, რომლებთან კონტაქტიც ბავშვს უძლიერებს იმუნიტეტს... ამ ბავშვებს ჯანმრთელობის ნაკლები პრობლემები აქვთ" - პედიატრის განმარტებები
ბოლო დროს სოციალურ ქსელში სულ უფრო ხშირად ვრცელდება ვიდეოები თუ ფოტოები, სადაც მშობლებს ახალშობილებთან ახლო კონტაქტში ჰყავთ ძაღლები, კატები. ცხოველები ეხებიან ნივთებს, რომლებსაც პატარები ყოველდღიურად იყენებენ. წვანან ერთსა და იმავე დივანზე, შეიძლება კატა ან ძაღლი ეტლშიც ჩაძვრეს. ეს ბევრი მშობლის აღშფოთებას იწვევს. სინამდვილეში რამდენად უსაფრთხოა ჩვილებისთვის ცხოველებთან ახლო კონტაქტი, რა სარგებელს იღებენ პატარები ამით და არსებობს თუ არა რაიმე რისკები - თემაზე პედიატრიული პრივატ კლინიკის პედიატრი, ევროპის რესპირაციული საზოგადოების წევრი ნანა ნარეკლიშვილი გვესაუბრება:

- მეცნიერულად დასაბუთებულია, რომ სახლში კატის, ძაღლის, თევზების, თუთიყუშისა
და ა.შ. არსებობა, ზრდის ბავშვთა იმუნორეაქტიულობას და დიდ გავლენას ახდენს მათი ემოციური სფეროს განვითარებაზე. ვეტერინარები თვლიან, რომ ეს ურთიერთობები ბავშვს კარგ ადამიანად, პიროვნებად ჩამოაყალიბებს და ნაკლებად ექნებათ აგრესია, დეპრესია, ფსიქოლოგიური პრობლემები, თავს არ იგრძნობენ მარტოსულად. ბავშვებსა და ცხოველებს შორის ემოცია იმდენად დიდია, რომ ეს ფსიქოთერაპიას უტოლდება.
საჭიროა, პატარას ცხოველებზე ზრუნვა თავიდანვე ვასწავლოთ. მნიშვნელოვანია, რომ ჰქონდეთ სიბრალული მიტოვებული, უპატრონო ცხოველების მიმართ, რათა სითბოსა და სიყვარულის გამოხატვა ჩვევად ჩამოუყალიბდეთ.

ძირითადად, იმ მშობლებს სურთ სახლში ჰყავდეთ ძაღლი ან კატა, ვინც თვითონ იზრდებოდა მათთან ერთად და უნდათ, ეს სასიამოვნო ემოცია მათმა შვილებმაც გაიზიარონ. მათ შორის, მხოლოდ დადებითი ემოციები არ არის მიზეზი. უკანასკნელ წლებში ჩატარებული კვლევების საფუძველზე დასტურდება, რომ ამ
ბავშებს ჯანმრთელობის ნაკლები პრობლემები აქვთ.

ახალშობილები და განსაკუთრებით საკეისრო კვეთით დაბადებული ბავშვები ხშირად ტირიან. მშობლებთან მათი კომუნიკაციის ენა ტირილია. ასე ეგუება მათი ნერვული სისტემა გარემო პირობებს. საოცარ დამამშვიდებელ ეფექტს ახდენს ბეწვიანი ცხოველების ურთიერთობა მათთან და ასეთ ოჯახებში პატარებს ძილი უკეთესი აქვთ, ნერვული სისტემა კი უფრო მშვიდი. ალერგიისა და ჭარბი წონის რისკიც ნაკლებია. კანადაში ჩატარებულმა გამოკვლევებმა ცხადყო, რომ ბავშვები ეჩვევიან ცხოველებთან ერთად აქტიურ ცხოვრებას, ასეირნებენ, დარბიან, თამაშობენ მათთან ერთად, ეფერებიან, ეხუტებიან. ძაღლებისა და კატების სხეულზე არსებული სასარგებლო, ჯანმრთელი ბაქტერიები, როგორებიცაა ოსცილოსპირა, რუმინოკოკი, პატარებს მათთან შეხების შედეგად გადაეცემათ და ეს ყველაფერი მათი იმუნიტეტის გაძლიერებას იწვევს, რაც განსაკუთრებით იმ პატარებისთვისაა მნიშვნელოვანი, რომლებიც საკეისრო კვეთით მოევლინენ ქვეყანას.
კვლევამ ასევე აჩვენა, რომ სახლში ცხოველის ყოლა ამცირებს დედისგან B ჯგუფის სტრეპტოკოკის გადაცემის ალბათობას, რაც ახალშობილებში პნევმონიის განვითარების რისკის შემცველია.

- ცხოველები ეხებიან პატარების პირად ნივთებს და ესრამდენად გამართლებულია?

- მიუხედავად დიდი სარგებლობისა, ცხოველებთან თანაცხოვრება აჩენს რისკებსაც. ასეთია: ბეწვის ასპირაცია, კბენა, ნაკაწრები, ტრავმა, დადორბვლა. კბენა, დადორბვლა, ნაკაწრები საშიშია, თუ ცხოველი არ არის აცრილი ცოფის საწინააღმდეგო ვაქცინით. ასევე, შესაძლებელია ცხოველები სხვადასხვა დაავადების გადამტანნი გახდნენ, თუ გეგმიურად არ უზრუნველყოფენ მათ ვეტერინართან ვიზიტებს და არ შევუქმნით სათანადო ჰიგიენურ პირობებს. ჯანმრთელობის დაცვა მათ ისევე სჭირდებათ, როგორც ბავშვებს.

- თუ ახალშობილი გაკაწრა ძაღლმა ან კატამ, რა საფრთხე არსებობს, რა უნდა გააკეთოს ამ დროს მშობელმა?

- თუ ბავშვი დაკაწრა, ან უკბინა კატამ, ძაღლმა, რომლებიც ვიცით, რომ ჩვენი მეთვალყურეობის ქვეშაა, აცრილია ყველა საჭირო ვაქცინით და ჯანმრთელია, ვაკვირდებით მის ქცევას 10 დღის მანძლზე. ბავშვს დაზიანებული ადგილი უნდა ჩამოვბანოთ საპნით და დავამუშაოთ ბეტადინით. კონსულტაციისთვის კი აუცილებლად ვრეკავთ ექიმთან. ძაღლი, კატა შედარებით აგრესიული ჭამის მომენტშია და საჭიროა, ამის შესახებ ბავშვები გავაფრთხილოდ, რომ კვების დროს ცხოველებთან კონტაქტი არ გადაწყვიტონ. მათ ჰგონიათ, რომ საჭმელს ართმევენ და უნებურად ზიანს გვაყენებენ.

- ზოგადად, როდესაც ოჯახი გადაწყვეტს ახალშობილთან ერთად სახლში ძაღლი ან კატა ჰყავდეთ, რა უნდა გაითვალისწინონ?

- როდესაც სახლში მოგვყავს კატა ან ძაღლი, საჭიროა, მივიღოთ ისე, როგორც ოჯახის ახალი წევრი. საკმაოდ დიდი პასუხისმგებლობით მოვეკიდოთ მის მოვლას, დაბანას, სწორ კვებას, გასეირნებას და ვეტერინართან კონსულტაციებიც დროულად ჩავატაროთ, რომ მივიღოთ სწორი რჩევები, როგორ ჩამოყალიბდნენ და განვითარდნენ ჩვენი ახალი ბინადრები ისე, რომ ოჯახში ცხოვრება საამური გახდეს.

თამარ იაკობაშვილი


3291
ბეჭდვა
მოგვწერეთ თქვენი შეკითხვები და მოსაზრებები
კომენტარები (0)
კომენტარი ჯერ არ გაკეთებულა
მსგავსი სიახლეები