ანჯელინა ჯოლის ძმის შესახებ ბევრმა არ იცის, არადა, წლების განმავლობაში ის ცნობილი დის გვერდით იყო და შეიძლება ითქვას, მის ჩრდილქვეშ ცხოვრობდა.
ჯეიმსი ანჯელინას უფროსი ძმაა, 1973 წელს დაიბადა. მისი და ენჯის მამა ცნობილი მსახიობი ჯონ ვოიტია, რომელმაც ძალიან მალე მიატოვა ოჯახი. და-ძმა მთელი ცხოვრება ვერ პატიობდა მამას ამ საქციელს და ენჯიმაც შეიცვალა გვარი თავის დროზე და ჯოლიდ იქცა, ჯეიმსმაც - დღეს მას იცნობენ, არა როგორც ჯეიმს ვოიტს, არამედ როგორც ჯეიმს ჰეივენს.
მათი დედა მარშელინ ბერტრანი ასევე პერსპექტიული მსახიობი იყო, თუმცა ქმართან გაყრის შემდეგ მიატოვა კარიერა და ბავშვებთან ერთად ქალაქის გარეუბანში გადავიდა საცხოვრებლად. მარშელინი 2007 წელს გარდაიცვალა საკვერცხეების კიბოთი.
და-ძმის საოცარი სილამაზე მათი შერეული სისხლია - მამისგან ისინი გერმანული და სლოვაკური წარმოშობის არიან, დედის ხაზით - ფრანკოკანადური, ჰოლანდიური და გერმანული. ზოგიერთ ინტერვიუში ჯეიმსი ასევე ამბობს, რომ ინდიელთა სისხლიც აქვს.
ჯეიმსი ცნობილი დასავით მსახიობია, ჯერ კიდევ ბავშვობაში აქვს რამდენიმე როლი შესრულებული. ამჟამადაც მსახიობობს და პროდიუსერობს, მის დოკუმენტურ ფილმს ცნობილ ინდიელ აქტივისტ ჯონ ტრუდელზე სერიოზული პრიზებიც აქვს მიღებული.
დედის გარდაცვალების შემდეგ და-ძმა მამას შეურიგდა, თუმცა მასთან ბევრ დროს არ ატარებენ. ჯეიმსი საკმაოდ ახლოს იყო დასთან წლების განმავლობაში და ბავშვების აღზრდაშიც ეხმარებოდა - თავად არც ცოლი ჰყავს და არც შვილები. მოგვიანებით, როდესაც ენჯი და ბრედი ერთმანეთს დაშორდნენ, პრესა წერდა, რომ ჯეიმსმა ბრედ პიტის მხარე დაიჭირა და ამ სიტუაციაში დას ამტყუნებდა, რის გამოც მათ შორის შავმა კატამ გაირბინა. თუმცა ახლა ურთიერთობები დაალაგეს და ისევ მოსიყვარულე და-ძმა არიან.