იმისათვის, რომ გოზინაყს და საცივს სათანადო ყურადღება დაუთმოთ, გადავწყვიტეთ ერთი საფიქრალი მოგაკლოთ და შემოგთავაზოთ ინფორმაცია იმ ღონისძიებების შესახებ, რომლებიც საახალწლო დღეებში პატარებისთვის იგეგმება.
სად წავიყვანოთ ბავშები სადღესასწაულო დღეებში?! საკმაოდ მრავალფეროვანი არჩევანი გვაქვს:
- ნოდარ დაუმბაძის სახელობის მოზარდ მაყურებელთა თეატრი "ალადინის" პრემიერით ხვდება ახალ წელს. სპეციალურად მიუზიკლისთვის თავიდან შეიქმნა ინსცენირება და არანჟირებები, რომელიც პროექტის ავტორსა და ჯინის როლის შემსრულებელს, მსახიობ ლევან გვაზავას ეკუთვნის. უჩვეულო სცენოგრაფია, ცოცხალი შესრულება, ულამაზესი კოსტიუმები, შთამბეჭდავი ქორეოგრაფია - ეს ყოველივე დაუვიწყარ სანახაობას ქმნის. ამას გარდა, მოზარდა მაყურებელთა თეატრი პატარებს სთავაზობს სპექტაკლს " ურჩუხლი და ლამაზმანი" და კიდევ რამდენიმე საბავშვო წარმოდგენას.
- ილიაუნის თეატრის სცენაზე, საახალწლო დღეებში ჰანს ქრისტიან ანდერსენის ზამთრის ზღაპარი "თოვლის დედოფალი" გაცოცხლდება, სადაც მეგობრობა და სიყვარული გაალღობს გაყინულ გულს.
- მუსიკისა და დრამის თეატრი პატარებს "საშობაო ზღაპრის" ნახვის საშუალებას აძლევს. საბავშვო მიუზიკლი "საშობაო ზღაპარი”, ყველასათვის ცნობილი ხალხური ზღაპრის - "მსუნაგი მგელი და შვიდი ბეკეკა”-ს მიხედვით დაიდგა, სადაც მუსიკალურ მასალად მსოფლიო ჰიტებია გამოყენებული. სანახაობას კიდევ უფრო მრავალფეროვანს ხდის პერსონაჟების უჩვეულო კოსტიუმები.
- ახმეტელის თეატრი პატარებს "მაკნატუნაზე" ეპატიჟება. სპექტაკლი ბავშვებს 200 წლის თოჯინის, მაკნატუნას ლამაზ უფლისწულად გადაქცევის ამბავს მოუთხრობს.
- ახალ წელს რუსთაველის თეატრიც პრემიერით ხვდება. "საახალწლო ნობათი" მიუზიკლია, სადაც მსახიობები მსოფლიოში ცნობილი კომპოზიტორების ნაწარმოებებიდან არიებს შეასრულებენ. სპექტაკლის რეჟისორი ნიკოლოზ-ჰაინე შველიძე გახლავთ, დადგმის ხელმძღვანელი - რობერტ სტურუა.
- მარჯანიშვილის თეატრის სცენაზე მაკა მახარაძის საბალეტო სტუდიის პატარა მსახიობები "შობის ვარსკვლავს" წარადგენენ.
- გრიბოედოვის თეატრი კი ბავშვებს იმ სპექტაკლების სანახავად ეპატიჟება, რომელიც ყველა პატარას უნდა ჰქონდეს ნანახი - "მაუგლისა" და "ბურატინოს" სწორედ ამ თეატრში შემოგთავაზებენ.
- ცირკის მოყვარულებს ალბათ გეცოდინებათ, რომ თბილისის ცირკი 80 წლის გახდა. უბილეს აღსანიშნავად ცირკი საახალწლო წარმოდგენებს გთავაზობთ. თბილისს საუკეთესო საცირკო დასი ეწვია! თქვენ გელოდებათ დაუვიწყარი სანახაობა სადაც წარმოდგენილი იქნებიან: არგენტინელი თუთიყუშების შოუ, ძაღლები, ცხენებზე მოჯირითეები, საჰაერო აკრობატები, ბალანსი ცილინდრებზე და სხვა ულამაზესი ნომრები.
- უამრავი ღონისძიება აქვს დაგეგმილი ქალაქ თბილისის მერიას, 25 დეკემბრიდან 13 იანვრის ჩათვლით, პირველი რესპუბლიკისა და ორბელიანის მოედნებზე. ტრადიციულად, 31 დეკემბერს, 23:00 საათზე, პირველი რესპუბლიკის მოედანზე, გალა-კონცერტი გაიმართება, სადაც ყველასათვის საყვარელი სატელევიზიო მუსიკალური შოუ „ერთი-ერთში“ ღია ცის ქვეშ გადაინაცვლებს.
ახალი წლის პირველ საღამოს თბილისს მსოფლიოში სახელგანთქმული მუსიკალური პროექტი MAX THE SAX ეწვევა და 21:00 საათზე პირველი რესპუბლიკის მოედანზე წარდგება მსმენელის წინაშე.
საახალწლო ღონისძიებების დასკვნითი კონცერტი 13 იანვარს, 20:00 საათზე დაიწყება.
პირველი რესპუბლიკის მოედანი (25 დეკემბერი - 13 იანვარი) - თოვლის ბაბუა და მისი ასისტენტები სანტას ზღაპრულ ქალაქში გიმასპინძლებენ, სადაც მთელი დღის განმავლობაში, მრავალფეროვანი გასართობ-შემეცნებითი წარმოდგენები მოეწყობა: ჟონგლიორი ჯამბაზების და ილუზიონისტების წარმოდგენა, შოუ ქიმიური ელემენტებით, მრავალფეროვანი ვორქშოფები პატარებისთვის, სასულე ორკესტრის და დრამერების წარმოდგენები, ზღაპრების კითხვა, საბავშვო ფილმების ჩვენება და სხვა. (12:00 - 20:00 სთ.)
5 და 10 იანვარს, თბილისს პატარა უფლისწული გადაუფრენს. საჰაერო შოუები 20:00 საათზე დაიწყება; მთელი დღის განმავლობაში, გაიმართება საბავშვო აქტივობები, კონცეტრები, ზღაპრის გმირების წარმოდგენები და ნაძვის ხის ხელნაკეთი აქსესუარების ვორქშოფები;
საახალწლოდ, თბილისის საშობაო ბაზარი გააერთიანებს პროექტებს „დააგემოვნე თბილისის ქუჩებში“ და „თბილისური ბაზარი“
ყოველ საღამოს, პირველი რესპუბლიკის მოედანზე, ქართული ესტრადის ვარსკვლავების და მუსიკალური ბენდების კონცერტები, ასევე დიჯეების მუსიკალური წარმოდგენები გელით.არანაკლებ საინტერესო იქნება კინოში სტუმრობა ახალი წლის დღეებში, სადაც სპეცილაურად ბავშვებისთვის საინტერესო სეანსებია ჩანიშნული. კინოში თქვენ ნახავთ: "გაყინული II-ს", "ჯაშუშ მტრედს", "ვარსკვლავურ ომები: სქაიუოქერის აღზევებას" და ა.შ.
- მთაწმინდის პარკში, ტრადიციულად, 25 დეკემბრიდან 14 იანვრის ჩათვლით გრანდიოზული, საახალწლო ღონისძიებები ჩატარდება. 25 დეკემბერს პარკს ეწვია სანტაც და თოვლის ბაბუც. ისინი პატარებს პარკის მთავარ მოედანსა და საბავშვო ზონაში შეხვდებიან. გარდა ამისა, მთაწმინდის პარკში დაგაგემილია: საახალწლო კონცერტები, სპექტაკლები, იქ დაგხვდებიან ანიმატორები, მიმები, ოჩოფეხები, დრამერები, საახალწლოდ მორთული გარემო, ატრაქციონები ყველა ასაკისთვის .
- წიგნების მაღაზიათა ქსელ "ბიბლუსს" წინასაახალწლო დღეებში უამრავი აქცია და საჩუქარი ჰქონდა ბავშვებისა და მათი მშობლებისთვის. ასევე დაგეგმილია ღონისძიება ხვალ, 29 დეკემბერს - სანტა ესტუმრება "ბიბლუსი გალერეებს", ჭავჭავაძის 7 და კანდელაკის 7-ში, 15:00 სთ-დან და ბავშვებს გაამხიარულებს.
- "ეი ბი სი" ლენდი პატარებს სპექტაკლს "რა მოხდა შობას ABC land"-ში გთავაზობთ. ლეგენდა „გრინჩზე“ ეიბისი-ლენდში გრძელდება. საახალწლო გმირები გრანდიოზულ სამზადისში არიან, რომ ჯადოსნურ ზღაპარში გამოგზაურონ.
- ზალიკოს ცენტრი პატარებს "უდაბნოდან ლაპლანდიამდე მოგზაურობას" კოსტუმირებულ ალადინთან, პრინცესა ჟასმინთან, ყოვლისშემძლე ჯინთან, მრისხანე ჯაფარასათან, მხიარულ გრინჩთან, თოვლის დედოფალთან, ლაპლანდიური ნაძვის ხესთან, სანტა კლაუსთან და თავად ზალიკოსთან ერთად სთავაზობს. ყველა ბავშვს კი საჩუქრად გადაეცემა ტკბილეულის ნაკრები.
- თბილისის დიდ საკონცერტო დარბაზში "ბასტი ბუბუ წვეულება BBB ფართიზე" გეპატიჟებათ. ბავშვებისთვის საყვარელი გმირები ბაბილინა, ბასტი, ბუბუ, ფერიების სკოლა, მოგზაურები და დოდი გიო მსოფლიოს გარშემო იმოგზაურებენ. მათ მოწვევები აქვთ 8 ქვეყნიდან და უნდა მოიფიქრონ თუ რას მოუყვებიან საქართველოს შესახებ.
- გალერია თბილისში, გასართობი ცენტრი რია-რია, ბავშვებს ნაძვის ხის მორთვაში დასახმარებლად ეპატიჟება. 30 დეკემბერს, საღამოს 7 საათზე, პატარები ნაძვის ხის სათამაშოებს, ახალგაზრდა მხატვარ ნენსი ვოულანდთან ერთად მოხატავენ. ნენსისთან ერთად ბავშვებს საინტერესო ვორქშოფი ელოდებათ.
- დაგეგმილია ღონისძიებები საქართველოს რეგიონებში და საკურორტო ქალაქებშიც. მაგალითად, 25 დეკემბრიდან 20 დღის განმავლობაში საირმე "საახალწლო კურორტად“ იქცევა. მხიარული ელფები, სანტას რეზიდენცია, საშობაო ბაზრობა, ცხელი გლინტვეინი, ყოველდღე ბავშვები ელფების დახმარებით, სხვადასხვა შემეცნებითი თამაშით ახალ 2020 წელს განსაკუთრებულად შეხვდებიან.
- 30 დეკემბერს, 19:00 საათზე ბათუმის მუსიკალურ ცენტრში წინასაახალწლო გალა-კონცერტი გაიმართება.
- ასევე ტრადიციულად, ბავშვებს დაელოდებიან მუზეუმებში, სკვერებსა და გასართობ ცენტრებში.
გისურვებთ ბევრ საინტერესო და მხიარულ დღეს საახალწლო არდადეგებზე და ბედნიერ ახალ წელს.
ციცი ომანიძე
