"ერთ დღეს გაიღვიძა და თქვა, მარცხენა თვალიდან ვერ ვხედავო... ძალიან ბეჯითად მეცადინეობდა" – 15 წლის ნინის იშვიათი დაავადება
"ერთ დღეს გაიღვიძა და თქვა, მარცხენა თვალიდან ვერ ვხედავო... ძალიან ბეჯითად მეცადინეობდა" – 15 წლის ნინის იშვიათი დაავადება
15 წლის ნინი ვადაჭკორიას საზოგადოების დახმარება სჭირდება. ის მძიმე ნეიროპათოლოგიითაა დაავადებული და ზუსტი დიაგნოზი ოჯახმა ჯერ კიდევ არ იცის. ნინის მამა, ოთარ ვადაჭკორია, შვილის მდგომარეობის შესახებ გვიყვება:

- ბავშვს საქართველოში მაგნიტურ-რეზონანსული ტომოგრაფია გადაუღეს და ხერხემლის სითხე გერმანიაში გააგზავნეს. ვიდრე სითხეს გააგზავნიდნენ, აქ დაუსვეს დიაგნოზი, რომლის თანახმადაც, ნინის გაფანტული სკლეროზი აქვს. გერმანიიდან ჩამოსულ პასუხში კი აღნიშნული იყო, რომ პასუხი სავარაუდოდ დადებითია. აქაური კვლევები მეგობრებისა და ახლობლების დახმარებით თავადაც გადავაგზავნე გერმანიაში. იქიდან ჩამომივიდა დასკვნა, სადაც წერია, რომ, ზოგადად, ამ დიაგნოზის დასასმელად არათუ
საკმარისი არ არის ის, რაც საქართველოში გაკეთდა, არამედ საკითხს კომპლექსური მუშაობა სჭირდება. მთელი რიგი პარამეტრებია გასათვალისწინებელი. ძალიან ღრმად ჩავყევი ყველაფერს, რადგან, როგორც მივხვდი, საქართველოში ამ დაავადების მქონე ბავშვების მკურნალობის დიდი გამოცდილება არ აქვთ. (ეს დაავადება საკმაოდ იშვიათია ბავშვებში) ევროპაში, ამ დაავადების მკურნალობის ერთ-ერთ ლიდერად ესპანეთი ითვლება. უამრავი ინფორმაცია ვნახე და აღმოჩნდა, რომ ეს არის დაავადება, რომელიც არ იკურნება და მთელი ცხოვრება ძალიან ძვირადღირებულ მკურნალობას საჭიროებს. სწორი მკურნალობა და შესაბამისი პრეპარატების შერჩევა სჭირდება. დაავადების მკურნალობის ქართული პროტოკოლი ამოვიღე. საქმე ისაა, რომ პროტოკოლს ჯერ დიდი ასოებით აწერია, რომ ეს არის გაფანტული სკლეროზის მართვის პროტოკოლი, ზრდასრული
ადამიანებისათვის. ჩემი შვილი 15 წლისაა, შესაბამისად, ბავშვებისთვის პროტოკოლი მე ვერ ვიპოვნე. ესპანური პროტოკოლი 65 გვერდიანია, ჩვენი კი - 25-იანი. მკურნალობის მეთოდები და კვლევები რომ შევადარე, ძალიან ბევრი რამ ქართულში საერთოდ არ წერია. წამლისთვის, რასაც აქ მინიშნავდა ექიმი და ჩემი შეკამათების შემდეგ, აღარ დანიშნეს, ოთხი გვერდია ესპანურ პროტოკოლში დათმობილი. ძალიან ბევრი პარამეტრია, რომელსაც უნდა აკმაყოფილებდეს პაციენტი, რომ ეს წამალი მიიღოს. არის მთელი რიგი აცრები, რომელიც გაკეთებული უნდა ჰქონდეს ბავშვს. მაგალითად, აუცილებლად უნდა ჰქონდეს ჩუტყვავილაზე აცრები ჩატარებული, მაშინ, როცა საქართველოში ჩუტყვავილის აცრა არასდროს გაკეთებულა.

- რა სიმპტომები აღენიშნებოდა თავიდან?

- ერთ დღეს გაიღვიძა და თქვა, რომ მარცხენა თვალიდან ვერ ხედავდა. იქამდე არაფერი აწუხებდა. პირველ დღეს ვუთხარი, რომ ბევრს კითხულობ და შეიძლება ამიტომ დაგემართა-თქო. ძალიან ბეჯითად მეცადინეობდა, კარანტინის პერიოდში კი განსაკუთრებით. მეორე დღეს რომ გაიღვიძა, მითხრა, რომ შენს სახესაც ვერ ვარჩევო. შემდეგ თითები ვაჩვენე და ვერ მითხრა რამდენი იყო. გამოვიძახეთ სასწრაფო და გადაგვიყვანეს "ნიუ ჰოსპიტალში" ოფთალმოლოგმა რომ გასინჯა გვითხრა, რომ არ იყო მისი პაციენტი, რადგან თვალის სტრუქტურა ნორმალური იყო. ნევროლოგთან წასვლა გვირჩია. მაგნიტურ-რეზონანსული ტომოგრაფია გადაუღეს და ნევროლოგმა გვითხრა, თავში რაღაც ლაქებიაო. ძალიან მოულოდნელი იყო ჩვენთვის. შემდეგ გადაგვიყვანეს იაშვილის კლინიკაში. დაგვისვეს გაფანტული სკლეროზის დიაგნოზი და ანთების საწინააღმდეგო ჰორმონები გადაუსხეს.

mshoblebi

- ახლა რა ეტაპზე ხართ?

- ახლა ნინი სახლშია. საავადმყოფოდან გამოგვიშვეს დიაგნოზით და დანიშნულება არ გვაქვს. იმიტომ, რომ მე მათ მიერ შემოთავაზებულ პრეპარატზე უარი ვთქვი, რადგან მას თავისი გვერდითი ეფექტები აქვს. ანალიზები და კვლევები, სხვადასხვა სპეციალისტის ჩართვა სჭირდება. უცხოურ პროტოკოლში პირდაპირ წერია, რომ არ შეიძლება ამ წამლის პირველ ჯერზე დანიშვნა. უნდა იყოს ნამკურნალები ბეტაფერონის ჯგუფის პრეპარატებით, და მკურნალობამ არ უნდა გამოიღოს შედეგი, ამის გარდა, მთელი რიგი პირობები და სტანდარტებია, რომელსაც კონკრეტული პაციენტი უნდა აკმაყოფილებდეს, მხოლოდ ამის შემდეგ შეიძლება წამლის დანიშვნა. კლინიკაში მითხრეს, რომ ცოტახანს დავიცადოთ და ორი კვირის შემდეგ მოვიფიქროთ, როგორ გავაგრძელებთ მკურნალობას. ამიტომ, მინდა, რომ საზღვარგარეთ წავიყვანო. რაც მოვიძიეთ, 15 ათასი ევროა საჭირო. ძალიან გაურკვეველ მდგომარეობაში ვართ. ზუსტად არც ის ვიცი, რა სჭირს ბავშვს. არაფერი ღირებული არ მაქვს, რომ გავყიდო და ეს თანხა შევაგროვო. გასაყიდი რომ რამე მქონდეს, ერთ წუთსაც არ დავფიქრდებოდი, მაგრამ ნაქირავებში ვცხოვრობთ. მთელი ცხოვრება შეიარაღებულ ძალებში ვმსახურობდი. 2016 წელს რეორგანიზაციით გამოგვიშვეს, ტურისტულში ვმუშაობ და ახლა, თავად მოგეხსენებათ, პანდემიის ფონზე ტურისტულში მუშაობა რასაც ნიშნავს. თუმცა არ შემიძლია არ ვთქვა, რომ ჩემმა სამსახურმა მოახერხა და მთელი ამ მძიმე პერიოდის მანძილზე ყველა თანამშრომელს შეუნარჩუნა სამუშაო ადგილი და ყოველთვიურად გვიხდიდა ხელფასის ნახევარს.

- თავად ბავშვმა თუ იცის დიაგნოზის შესახებ?

- დიახ, იცის. ფსიქოლოგთანაც დაგვყავს, თავად საკმაოდ მედგრად შეხვდა იმიტომ, რომ მშობლებსაც არ გვაქვს სასოწარკვეთილების განცდა, იმედიანად ვართ და რომ გვიყურებს, თავადაც მხნევდება. ერთი შვილი გვყავს, ვუხსნით, რომ რაღაც სჭირს, მაგრამ სჭირდება სწორი მკურნალობა. შესაბამისად, ფსიქოლოგიურად ნორმალურ მდგომარეობაშია. ყველანაირად ხელს ვუწყობთ, რომ ასე იყოს.
ადამიანები საოცარ ძალას გვაძლევენ. ვერ ვიკავებ ემოციებს, როდესაც ჩემთვის სრულიად უცხო ადამიანები გვეხმარებიან, თან ასეთ მძიმე პერიოდში, ყველას მინდა სათითაოდ გადავუხადო მადლობა ყოველი გაღებული ლარისთვის. ყველას მინდა ჯანმრთელობა და დიდი ხნის ბედნიერი სიცოცხლე ვუსურვო.

დახმარების მსურველებს შეგიძლიათ თანხა ჩარიცხოთ შემდეგ ანგარიშის ნომრებზე:
თიბისი ბანკი
GE08TB7158645064300017

საქართველოსბანკი
GE18BG0000000345889876

მიმღები - ოთარ ვადაჭკორია (მამა)

თამარ იაკობაშვილი

14406
ბეჭდვა
მოგვწერეთ თქვენი შეკითხვები და მოსაზრებები
კომენტარები (8)
giorgi
0
მამის საკონტაქტო იქნებ დადოთ რომ დავუკავშირდეთ რა
16:23 / 06-06-2020
მაიკო
0
ღმერთმა ჯანმრთელად გამყოფოს ულამაზესო გოგო. ყველაფერი კარგად იქნება.
14:30 / 04-06-2020
მსგავსი სიახლეები

გამოკითხვა
რომელია თქვენი ბავშვის საყვარელი მულტფილმი?
ყველაზე კითხვადი