მიეფიცხე წიგნებს - 10 წიგნი, რომელიც ამ ზაფხულს აუცილებლად უნდა წაიკითხოთ
მიეფიცხე წიგნებს - 10 წიგნი, რომელიც ამ ზაფხულს აუცილებლად უნდა წაიკითხოთ
მთელი წლის განმავლობაში ვაგროვებთ წიგნების ჩამონათვალს, რომლის წაკითხვაც გვინდა, თუმცა გადატვირთული რეჟიმის გამო, ვერ ვახერხებთ, საბოლოოდ კი ამის დრო ზაფხულში დგება, როცა შეგვიძლია, მზესთან ერთად, საინტერესო ნაწარმოებებსაც მივეფიცხოთ.
წელიწადის ეს დრო საუკეთესოა მხატვრულ ლიტერატურაზე მეტად კონცენტრირებისთვის. ეს ერთგვარი „ინტელექტუალური დასვენების“ ფორმაცაა.
სასურველი წიგნები შეგვიძლია არათუ წავიკითხოთ, არამედ აგარაკზე წასვლისას გზად, ჰამაკში, პლაჟზე, აუზსა თუ მთაში მოვისმინოთ კიდეც და დავტკბეთ სასიამოვნო გარემოთი და ლიტერატურის შედევრებით.
იმისათვის, რომ შერჩეულმა წიგნმა იმედი არ გაგიცრუოთ, ჩვენ 10-წიგნიანი ჩამონათვალი გაგიკეთეთ, რომელიც შთაბეჭდილებას აუცილებლად მოახდენს. აი,
წიგნები, რომელთაც ამ ზაფხულს უნდა „მივეფიცხოთ“:

„თამაში ჭვავის ყანაში“ – ჯერომ სელინჯერი

თუ ამერიკელი მწერლის ეს წიგნი ჯერ კიდევ არ წაგიკითხავთ, ძალიან იღბლიანი ხართ, რადგან წინ თითქოსდა არაფრით გამორჩეული ახალგაზრდის სევდიანი მონათხრობი, რომელსაც ვერ მოწყდებით.
რომანი გამოცემისთანავე იქცა კრიტიკის მსხვერპლად და 1961-1982 წლებში აკრძალულ წიგნად ითვლებოდა. რომანი მოგვითხრობს 16 წლის ჰოლდენ კოლფილდზე, რომელიც სასწავლებლიდან გარიცხეს და სახლში ბრუნდება. ჰოლდენი ფიქრობს, რომ ის უკვე გადაიჩეხა იმ უფსკრულიდან, რომელიც ჭვავის ყანაში იყო ჩამალული. მაგრამ მას სურს, რომ სხვები მაინც გადაარჩინოს. იდგეს უფსკრულის პირას და უყუროს ბავშვებს, რომლებიც თავისთვის თამაშობენ, ხოლო როცა მათ გადავარდნის საფრთხე დაემუქრებათ, გადაარჩინოს
ისინი.

„დანაშაული და სასჯელი“ - ფიოდორ დოსტოევსკი

დოსტოევსკის ეს ნაწარმოები კლასიკად მიიჩნევა და ალბათ, სანამ ცოცხალი ხარ, აუცილებლად უნდა წაიკითხო. 1866 წელს, როცა ის პირველად დაიბეჭდა, ავტორისთვის მსოფლიო აღიარების მომტანი აღმოჩნდა.
სიუჟეტი ვითარდება მთავარი გმირის როდიონ რასკოლნიკოვის ირგვლივ, რომლის გონებაშიც მწიფდება დანაშაულის თეორია. რასკოლნიკოვი მოხუცი მევახშის მოკვლას გადაწყვეტს, თუმცა იძულებული გახდება მოკლას მოწმეც — მისი და. მაგრამ რასკოლნიკოვისთვის შეუძლებელი ხდება ისარგებლოს ნაქურდალით. ამის შემდეგ იწყება დამნაშავის საშინელი ცხოვრება.

„ქარიშხლიანი უღელტეხილი“ - ემილი ბრონტე

ცნობილი მწერლის ემილი ბრონტეს წიგნი ,,ქარიშხლიანი უღელტეხილი'' ინგლისური ლიტერატურის ერთ-ერთ საუკეთესო ნიმუშად არის მიჩნეული. წიგნი პირველად 1947 წელს გამოაქვეყნეს ლონდონში და დღემდე უამრავი ადამიანის უსაყვარლესი ნაწარმოებია, რომელიც გულგრილს არც თქვენ დაგტოვებთ.
წიგნის მთავარი მამოძრავებელი ძალა სიყვარულია ანუ მისტერია, რომელიც უსასრულოდ გრძელდება.

„სიყვარულის ორმოცი წესი“ - ელიფ შაფაქი

ბოლო დროს, ჩვენს გარშემო ამ წიგნის შესახებ ბევრს საუბრობენ და თუ ჯერ არ წაგიკითხავთ, ამის დრო სწორედ ამ ზაფხულს მოვიდა.
თურქი მწერალი ქალის ელიფ შაფაქის რომანში მთავარი გმირი ელი რუბენშტეინი, 40 წლამდე მშვენიერი ცოლი და დედა იყო. ის მშვიდად და აუღელვებლად ცხოვრობდა. შვილების წამოზრდის შემდეგ ელი გადაწყვეტს, რომ პროფესია გაიხსენოს და მუშაობას ერთ-ერთ გამომცემლობაში იწყებს. პერსონაჟს ხელში ჩაუვარდება უცნობი ავტორის ხელნაწერი, რომელიც მის ცხოვრებას მთლაინად ცვლის. მისი ცხოვრება თავდაყირა დგება.

„ნასესხები სიცოცხლე“ - ერიხ მარია რემარკი

ცნობილი მწერლის ერიხ მარია რემარკის რომანი „ნასესხები სიცოცხლე“ 1959 წელს გამოქვეყნდა. რომანის ერთ-ერთი მთავარი პერსონაჟი, ლილიანი ტუბერკულოზით დაავადებული ახალგაზრდა ქალია, რომელსაც სამკურნალო დაწესებულებაში დარჩენილი ცხოვრების გატარება არ სურს. მას შემდეგ რაც იგი ავტომრბოლელ კლერფერს შეხვდება ისინი ევროპაში სამოგზაუროდ მიდიან.

„შვიდი მომაკვდინებელი გრძნობა“ - ნიკოლოზ ტოტოღაშვილი

ქართველი მწერალი უცნაური მხატვრის იან კლაინის ისტორიას გვიამბობს, რომლისთვისაც ყოველი დღე ერთნაირად უიმედოა; ფილოსოფიაც თავისებური აქვს - ფერების ფილოსოფია; მეგობრებიც ჰყავს, თუმცა მაინც მარტოსულია... ქალაქში მკვლელობების სერია იწყება და დეტექტივები მორგანი და ფორდი ამ საქმეებს იძიებენ. იანი კი პოლიციის განყოფილების მხატვარი გახდება და დახატავს ბოროტმოქმედთა ფოტორობოტებს; თუმცა, რატომღაც, დამნაშავის კვალი ყოველთვის იან კლაინთან მიდის. საინტერესოა, ვინ არის რეალური დამნაშავე - ეს საინტერესო ისტორია თქვენზე დიდ შთაბეჭდილებას მოახდენს.

„ამ მთისა და იმ ბარისა“ - ელის დოდჯსონი

ახალგაზრდა მწერალი, რომელიც ქართველმა მკითხველმა უკვე აღიარა სიყვარულში იმედგაცრუებული ახალგაზრდა ქალის ამბავს მოგვითხრობს, რომელიც დიდ ტკივილსა და დიდი ქალაქის აურზაურს მთაში გაურბის, უჩვეულო სიწყნარეს, სილამაზეს და მიტოვებული სოფლის ლანდებს აფარებს თავს.

„ფრანით მორბენალი“ - ხალიდ ჰოსეინი

შეიძლება ითქვას, ხალიდ ჰოსეინი თანამედროვე აღმოსავლური ლიტერატურის ბრილიანტია, მისი ეს ნაწარმოები კი ბესტსელერი, რომელიც აუცილებლად უნდა წაიკითხოთ. წიგნის გაყიდული ეგზემპლარების რაოდენობამ, აშშ-სა და მის ფარგლებს გარეთ, შთამბეჭდავ რიცხვს, 21 მილიონს მიაღწია.

წიგნში მოთხრობილი ამბავი ავღანეთში ვითარდება. ავღანეთში საბჭოთა კავშირის შეჭრას ავტორი მშვიდობიანი ცხოვრების დასასრულის დასაწყისს უწოდებს. მოგვიანებით ერთი უბედურება მეორეთი იცვლება. თალიბანი ავღანელებისთვის კიდევ უფრო სასტიკი მტერი აღმოჩნდა, ვიდრე საბჭოთა კავშირი. განუკითხაობა, სექსუალური ძალადობა, ობოლი ბავშვები, მათხოვრებით მოფენილი ქუჩები – ასეთია ავტორის მიერ დახატული ავღანეთი.

„ისევ მე“ - ჯოჯო მოიესი

ალბათ, ყველას გინახავთ დრამა და რომანტიკა „მე შენამდე“, სადაც ემილია კლარკი შესანიშნავად თამაშობს. შეუძლებელია, დასასრულმა ცრემლი არ მოგგვაროს. ფილმი სწორედ ჯოჯო მოიესის ნაწარმოების „მე შენამდე“-ს მიხედვითაა გადაღებული. მისი მეორე ნაწილი „შენ შემდეგაც“ ბესტსელერად იქცა.
ახლა კი ტრილოგიის მესამე ნაწილი გამოიცა. იარების საბოლოოდ მოსაშუშებლად და თავისი გზის დამოუკიდებლად საპოვნელად ლუისა ნიუ-იორკში, მილიონერი წყვილის ოჯახში სამუშაოდ გადადის. საინტერესოა, როგორ დასრულდება მისი ისტორია?

„ნუ მოკლავ ჯაფარას“ – ჰარპერ ლი

სიკეთით, სიყვარულითა და მზრუნველობით გაჟღენთილი ნაწარმოები თავის დროზე სამართლიანად აღიარეს ყველაზე ჰუმანურ ამერიკულ წიგნად.
დიდი დეპრესიის პერიოდში ალაბამის შტატის ერთ პატარა ქალაქში განვითარებული, 6 წლის გოგონას, ჯინ ლუიზა ფინჩის თვალით დანახული მოვლენები თანამედროვე მკითხველსაც ასწავლის, რა არის კარგი და რა – ცუდი, რომ ადამიანური წარმოდგენები ხშირად იცვლება, რომ ამქვეყნად ყველაზე მნიშვნელოვანი სიყვარული და სამართლიანობაა.
შეუძლებელია, წიგნის გმირები არ შეგიყვარდეთ.


355
ბეჭდვა
მოგვწერეთ თქვენი შეკითხვები და მოსაზრებები
კომენტარები (0)
კომენტარი ჯერ არ გაკეთებულა
მსგავსი სიახლეები

გამოკითხვა
რომელია თქვენი ბავშვის საყვარელი მულტფილმი?
ყველაზე კითხვადი