როგორც ცნობილია, წლების წინ საქართველოს რამდენიმე სამშობიაროში "წარმატებით" იყო ათვისებული ბავშვებით ვაჭრობის პრაქტიკა. ამის შესახებ არაერთხელ გაგვიგონია გამწარებული, შვილდაკარგული მშობლებისგან თუ გაშვილებული ადამიანებისგან.
სოციალურ ქსელში შექმნილია ჯგუფი "ვეძებ", პლატფორმა, სადაც ადამიანები დაკარგულ ოჯახის წევრებს ეძებენ და სწორედ ამ ჯგუფში, რომლის მეშვეობითაც რამდენიმე ადამიანმა იპოვა ერთმანეთი, მოისმენთ მართლაც ტრაგიკულ ამბებს, თუ როგორ უშვილებდნენ ბავშვებს დედებს, როგორ ატყუებდნენ, რომ მათი ახალშობილი მოკვდა და როგორ ბოროტად ერეოდნენ ადამიანების ბედში, ცხოვრებაში, მომავალში.
ესეც ერთ-ერთი ასეთი ნაამბობია იმაზე, თუ როგორ ხდებოდა ხოლმე მსგვსი ფაქტების მიჩქმალვა და როგორ ატყუებდნენ მშობიარეებს:
"კიდევ ერთი ფაქტი, თუ როგორ ატყუებდნენ მშობელს.
დაახლოებით 96-97 წლებში ვმუშაობდი პირველ სამშობიაროში, ნახალოვკაში, ბებიაქალად. ერთ დღეს დასჭირდათ დახმარება და დამიძახეს, შევედი პალატაში, ახალგაზრდა გოგონა მშობიარობდა, ბავშვი დღენაკლული, 8-თვიანი იყო, მშობიარობას ესწრებოდა ლ. ექიმი, რომელიც თვალყურს ადევნებდა, და თან იძახდა: ბავშვი დედას არ დაანახოთ, ცოდოა, მახინჯი ნაყოფიაო...
მოკლედ ამ გოგონამ დიდი ტკივილებით გააჩინა - გოგონა იყო დედასავით დაკალმული, თუმცა ბავშვი რომ მივიღეთ, ექიმი მაინც ყვიროდა, ჩქარა, ჩქარა, დედამ არ დაინახოს, დროზე გაიყვანეთო... გამიკვირდა.. რადგან ბავშვი 8-თვიანის კვალობაზე, ძალზე ჯანმრთელად გამოიყურებოდა. დედა მისვენებული, გადაღლილი თავს ვერც წევდა. უცებ პედიატრმა გაახვია ბავშვი პლედში და გაიყვანა პედიატრიულ განყოფილებაში... გავეკიდე, და ვკითხე, რატომ ამბობდა ექიმი იმას, რაც არ იყო? მან მკვახედ მომიგო, რაც შენი საქმე არაა, ცხვირს ნუ ყოფო... ძალიან ავნერვიულდი, ბავშვი 100 პროცენტით ჯანმრთელი ჩანდა. მივხვდი, რაც ხდებოდა, მინდოდა დედის ნახვა, მაგრამ რომ შევედი, უკვე გადაყვანილი ჰყავდათ პალატაში და არ მითხრეს, სად... შენი მორიგეობა დასრულდა და წადიო...
რა მინდა ვთქვა: ამ გოგოს, ვინც იმშობიარა, ქმარი ჰყავდა ახალი გარდაცვლილი, თუ სწორად მახსოვს (ფილტვების ანთებით), 40 არ იყო გასული, და არც არავის ჰქონდა ალბათ თავი, ბავშვი მოეკითხათ. რაც უთხრეს, დააჯერეს... ექიმი ისე დამაჯერებლად ამბობდა, უი, უი რა მახინჯია ბავშვი, გადამალეთ, დედას არ შეახედოთო, ეს ხომ ექოზეც გითხრესო, აშჯარად უთითებდა იმაზე, რომ ექოსკოპიის ექიმიც შეკრული იყო...
დღემდე ლოდად მაწევს ეს ამბავი და თუ დაემხარება ვინმეს და ამოიცნობენ თავს, ამით მაინც ვინუგეშებ... ამ ამბის მერე, საერთოდ წამოვედი სამშობიაროდან..."