"7 წლის წინ სამი შვილი თვალცრემლიანი დავტოვე და აქ სხვის შვილებს ვზრდი…"
"7 წლის წინ სამი შვილი თვალცრემლიანი დავტოვე და აქ სხვის შვილებს ვზრდი…"
ეს წერილი ძალიან პოპულარულია სოციალურ სივრცეში, თქვენც გთავაზობთ:

"ემიგრანტი ქალის წერილი საქართველოს‼️
გამარჯობა საქართველოვ!
მე შენი მიწის შვილი ვარ, იმ მიწის, სადაც დავიბადე და პირველად “დედა” დავიძახე;
მე ის ქართველი ვარ, ვინც ქართულად შენს მიწაზე ისწავლა “აი ია”;
მე შენს მიწაზე ქალბატონად დაბადებული ქართველი ქალი ვარ, დედა და შვილი;
ახლა სხვის მიწაზე სხვისი შვილების გამზრდელი ძიძა მქვია.
იცი, საქართველოვ?! მანდ, შენთან, 7 წლის წინ სამი შვილი თვალცრემლიანი დავტოვე და აქ
სხვის შვილებს ვზრდი… მე სხვის შვილებს ვეუბნები დილა მშვიდობისას.
უმცროსი შვილი 4 წლის დავტოვე, ახლა უკვე 11 წლისაა, ერთხელ ვკითხე:
- გახსოვარ, დედი?
- არა… მე მხოლოდ შენი წასვლა მახსოვსო, – მითხრა. იცი, ეს რას ნიშნავს, საქართველოვ? იმას, რომ შვილებს დედები დაავიწყდათ… იციან, რომ ჰყავთ დედა, სადღაც ძალიან შორს და იციან, რომ მალე დაუბრუნდებათ ის… ეს მალე არ გადის, წლებს წლები ემატება, თვეებს – თვეები და მე აქ, სხვის მიწაზე ჭაღარა მემატება...
ჩემო საქართველოვ, ვინ მოგცა შვილი სხვა მიწაზე დასაკარგი?
რა დაგიტოვე და რას მახვედრებ? სევდა დაგიტოვე, სამი პატარა სევდა და ახლა უკვე დიდად გაზრდილები, კიდევ სევდიანები დააბიჯებენ შენს მიწაზე…


"მე შენ დაგაბრუნებ,
დედა... ისე, როგორც გეკადრება" - მონატრებული ვაჟის წერილი ემიგრანტ დედას



ჩემო საქართველოვ! რატომ დადის ჩემს მიწაზე ამდენი ძაძებით შემოსილი ქართველი ქალი?
დაიღალე, სამშობლოვ ჩემო? არარაობების ბოგინით არა? მეც დავიღალე, სხვის მიწაზე მოსამსახურე რომ მქვია…
შვილები მენატრება, შენი სუნი მენატრება, ჩემო მიწავ…
იცი?! აქ ისე არ ამოდის მზე, როგორც მანდ. არც ისეთი ლამაზია დილა, როგორც ჩემს მიწაზე…
გამარჯობა, საქართველო, ბევრი მაქვს მოსაყოლი და უბრალოდ მომისმინე, მე შენი მიწიდან იძულებით წასული ერთი ემიგრანტი ვარ, რომელსაც ძალიან ენატრები!!!"
წყარო: ემიგრანტი ქალი
2580
ბეჭდვა
მოგვწერეთ თქვენი შეკითხვები და მოსაზრებები
კომენტარები (2)
mara
0
ვიტირე, მეც სამი შვილის დედა ვარ, მაგრამ ჩემს შვილებთან ვარ, როგორ მესმის თქვენი და როგორ მტკივა გული , რომ საშველი არ არის. უფლის წყალობით მალე ჩახუტებოდით თქვენს შვილებს.
20:39 / 27-05-2018
emigranti
4
სრული სიმარტლეა სამწუხაროდ რომელსაც ჯერ დასასრული არ უჩანს.
12:42 / 24-03-2018
მსგავსი სიახლეები
```