"- ბებო, ყველი მინდა, ყველი!.. - მარხვაა, ბებო, მარხვა..."
"- ბებო, ყველი მინდა, ყველი!.. - მარხვაა, ბებო, მარხვა..."
- მარხვაა, ბებო, მარხვა, - გული უდნებოდა მკერდში ბებიას.
- მარხვა რა არის?
- ღმერთის დღეებია, ბებო გენაცვალოს.
- ღმერთის დღეებში ყველისა და ერბოს ჭამა არ შეიძლება, ბებო?
- არა, არ შეიძლება.
- არც კვერცხის? - ახლა კვერცხი მოუნდა ხუჭუჭულას.
- არც კვერცხის, ბებო.
- და არც რძის დალევა არ შეიძლება, ბებო?
- არც რძისა.
- ჩიჩია, ბებო?
- არც ჩიჩია, ბებო გენაცვალოს! - უფრო და უფრო უდნება პატარა ბიჭის საცოდაობით მოხუცს მკერდში ცხოვრებისაგან ისედაც დალეული გული.
- როცა ჭამა
შეიძლება, მაშინ ღმერთის დღეები არ არის, ბებო?
- მაშინაც ღმერთის დღეებია, ოღონდ სამხიარულო დღეები.
- ყველა დღე ღმერთის დღეა?
- ხო, ბებო, ყველა დღე ღმერთის დღეა, დაილოცოს იმის სამართალი.
- ჩვენც ღმერთმა გაგვაჩინა.
- მაშ!
- ხან ჭამეთ და ხან არ ჭამოთო? - ისე კითხულობს ხუჭუჭულა, ეტყობა შია.
ბებიამ სკივრში გადანახული კაკალი ამოუღო და უბე გაუვსო.
სიხარულით ცას ეწია ხუჭუჭულა.
- კაკალი სულმუდამ ჭამეთო ბებო? - სიხარულჩამდგარი თვალები შეანათა ბებიას.
- ჰო, გენაცვალოს ბებო, ჩემო ხუთკუნჭულა ბიჭო! - ხმაშიც და გულშიც სითბო ჩაუდგა ბებოს.
კაკლით, ჩირით, თხილით და სხვადასხვა სასუსნავით გაასრულა ხუჭუჭულამ თავისი
პირველი მარხულობა.
გოდერძი ჩოხელი, "ხუჭუჭულა"
5545
ბეჭდვა
მოგვწერეთ თქვენი შეკითხვები და მოსაზრებები
კომენტარები (2)
ნანა
0
ბავშვობიდან მიყვარს მისი შემოქმედება. კიდევ ერთხელ ყელში მოწოლილი ბურთი და ლოყაზე ჩამოგორებული ცრემლი. ცრემლი სიკეთის, მოგონების, მონატრების...
09:00 / 18-03-2016
თამთა
0
მეტირება... :-(
23:08 / 16-03-2016
მსგავსი სიახლეები

გამოკითხვა
რომელია თქვენი ბავშვის საყვარელი მულტფილმი?
ყველაზე კითხვადი