ამოიღეთ ისინი თქვენი რაციონიდან! ის, რასაც ყოველდღე მივირთმევთ, ჩვენზე გავლენას ახდენს, განსაკუთრებით კი ჩვენს გარეგნობაზე და განწყობაზე. ჩვენს დროში ბუნებრივ პროდუქტებს ხშირად ენაცვლება სხვადასხვა კონსერვანტი, რომლებიც ჯანმრთელობას ვნებენ. დიეტოლოგებმა ხუთი ყველაზე მავნე პროდუქტი დაასახელეს, რომელთა რაციონიდან გამორიცხვა თურმე არა მხოლოდ გახდომაში დაგეხმარებათ, არამედ ჯანმრთელობის გაუმჯობესებაშიც და გაახალგაზრდავებაშიც. შესაბამისად, მათი ხშირი გამოყენება ამ ყველაფრის საპირისპირო შედეგებს იწვევს.
1. ტრანსცხიმები
განსაკუთრებით ბევრი ტრანსცხიმებია კარტოფილ ფრიში, პოპკორნში, ნამცხვრეულში, ჩიფსებში, კრეკერებში, ორცხობილებში, მარგარინსა და ტორტებში. მათი გამოყენება იწვევს სიმსუქნეს და გულის დაავადებებს, ასევე – ნაადრევ დაბერებას.
2. გლუკოზა-ფრუქტოზის სიროფი
ეს სიროფი შაქრის იაფი შემცვლელია და მას შეიცავს ბევრი ნაყიდი ტკბილეული, გაზიანი სასმელები და კონსერვები. სიროფი აუმჯობესებს საკვების გემოს და მის ვადას ახანგრძლივებს. მისი ხშირი გამოყენება იწვევს ღვიძლისა და გულის დაავადებებს, კარიესს. დიეტოლოგები გვირჩევენ, ასეთი საეჭვო ტკბილეული ჩავანაცვლოთ შავი შოკოლადით (კაკაოს მაღალი შემცველობით), შაქარი კი – თაფლით. და რასაკვირველია, მივიღოთ ბევრი ბუნებრივი ხილი.
3. რაფინირებული მარილი
მარილი მავნე პროდუქტია, რომელიც ორგანიზმში წყლის მარაგს ბლოკავს და ჰიპერტონიის ერთ-ერთი მიზეზია. მარილის ბოროტად გამოყენება დაბერების პროცესსაც აჩქარებს. ეცადეთ, მარილის ოდენობა მკვეთრად შეამციროთ, თუ საჭმლის გემო არ მოგეწონათ ცოტა მარილით, მაშინ მწვანილსა და სუნელებს, ნიორს მოუმატეთ და ნახავთ, როგორი გემრიელი იქნება ბევრი მარილის გარეშეც.
4. გადამუშავებული ხორცი
ბევრი ხორცპროდუქტია მაღაზიის დახლებზე – ძეხვი, ლორი, ბეკონი... თუმცა ისინი კონსერვანტებს შეიცავს, რომლებიც ბევრ პრობლემას უქმნის ორგანიზმს. თუ ხშირად იყენებთ გადამუშავებულ ხორცს, ორგანიზმი ვეღარ გამოიმუშავებს კოლაგენს – სასიცოცხლო ცილას. მისი უკმარისობისგან კანი დაბერებას იწყებს და არაჯანსაღ ფერს იძენს.
5. ალკოჰოლი
ალკოჰოლს ღვიძლი გადაამუშავებს, რომელიც ტოქსინებს ანეიტრალებს. მაგრამ მას ყველაფერთან გამკლავება არ შეუძლია, რადგან დრო სჭირდება აღდგენისთვის. რაც არ გადამუშავდება, ის ორგანიზმს აზიანებს, გარეგნულად კი გამოხატება კანზე აკნეს, დერმატიტებისა და ნაოჭების სახით.
ერთი სიტყვით, ისევ და ისევ გვირჩევენ დიეტოლოგები, გულმოდგინედ შევარჩიოთ პროდუქტები, წავიკითხოთ შემადგენლობა, ვადები და უფრო ხშირად მიირთვათ ხილი და ბოსტნეული.