რატომ არ ამოდის პასკა - 8 გავრცელებული შეცდომა პასკის ცხობისას
რატომ არ ამოდის პასკა - 8 გავრცელებული შეცდომა პასკის ცხობისას
სააღდგომო პასკის გამოცხობა მნიშვნელოვანი პროცესია და ვერ იტანს ვერც აურზაურს, და ვერც სიჩქარეს. იცოდით, რომ ცომის მომზადება პარასკევს, აღდგომამდე 2 დღით ადრე, უნდა დაიწყოთ? ხოლო, იმისათვის, რომ პასკა გამოვიდეს ჰაეროვანი, არ იფშვნებოდეს და დიდხანს შეინარჩუნოს გემოვნური თვისებები, საჭიროა ყველა პირობა დაიცვათ და ყველაზე გავრცელებული შეცდომები თავიდან აირიდოთ. წარმოგიდგენთ 8 ყველაზე გავრცელებულ შეცდომას პასკის ცხობის დროს.

შეცდომა №1: სხვადასხვა ტემპერატურის პროდუქტები

ყველა ინგრედიენტი ოთახის ტემპერატურის უნდა იყოს. მხოლოდ ასე გახდება ცომი ერთგვაროვანი და კარგადაც ამოვა. ამიტომ, ვიდრე პროცესს დაიწყებთ, მაცივრიდან წინასწარ გამოიღეთ რძე, კარაქი, კვერცხი და დააწყვეთ სამზარეულოში, ნახევარი
საათით ადრე მაინც.

შეცდომა №2: გაუცრელი ფქვილი

როდესაც ფქვილს ცრით, ის ჟანგბადითაა გაჯერებული, რაც იმას ნიშნავს, რომ ცომი უფრო ჰაეროვანი გამოვა და უკეთაც გამოცხვება. აუცილებლად აარჩიეთ უმაღლესი ხარისხის ფქვილი, რადგან ის უფრო მეტ ცილასა და გლუტენს შეიცავს. შედეგად, პასკა არ იშლება და ხდება ფუმფულა. შეიძლება ფქვილი რამდენიმე დღის წინ გაცერით, ამის მიუხედავად, უშუალოდ ცხობის წინაც საჭიროა გაცრა.

შეცდომა №3: ბევრი საფუარი

პასკის ცომი ნელ-ნელა უნდა გაფუვდეს, მხოლოდ ამ შემთხვევაში გამოვა ჰაეროვანი. ამიტომ, ნუ დაამატებთ ბევრ საფუარს. ოპტიმალური რაოდენობის მისაღებად, მნიშვნელოვანია შემდეგი წესი იცოდეთ: საფუარი ფქვილის 5% უნდა იყოს.

შეცდომა №4: ცომის ხაშის გამოყენება კარგად ამოფუვების გარეშე

ხაშს არ დაამატოთ მარილი და კარაქი. ისინი ხელს უშლიან გაფუების პროცესს. მასა ოთახის ტემპერატურაზე, ორპირი ქარისგან მოშორებით, 40 წუთის განმავლობაში უნდა დატოვოთ. ის ზომაში გაიზრდება და
ბუშტებიც გაჩნდება. თუმცა, არ იჩქაროთ გამოყენება. დაელოდეთ, რომ კარგად დაისვენოს. ცომის ხაში საფუარის, შაქრის, თბილი რძის ან წყლის ნაერთია და ეს ერთ-ერთი ყველაზე მნიშვნელოვანი ეტაპია პასკის ცხობის პროცესში. როგორი გამოვა საბოლოოდ სააღდგომო პასკა, მეტ წილად მასზეა დამოკიდებული.

შეცდომა №5: არაერთგვაროვანი ცომი

ცომის დიდხანს ხელით მოზელვა ძალიან რთულია. თუ გაქვთ სპეციალური ელექტრო მოწყობილობა, რომელიც ამ საქმეს თქვენ ნაცვლად გააკეთებს, ხომ კარგია, სხვა შემთხვევაში, უნდა მოზილოთ, ვიდრე ძალა გეყოფათ. ცომს კარგად გაფუების საშუალება უნდა მისცეთ და ვიდრე ფორმებში გადაიტანთ, რამდენიმე საათით გააჩეროთ. პასკის სტრუქტურა სწორედ ამ პროცესზეა დამოკიდებული, იქნება ის რბილი და ერთგვაროვანი, თუ პირიქით.

შეცდომა №6: ტემპერატურის ცვლილება

ცომი არასდროს მოათავსოთ გამათბობელთან ან თბილ ღუმელში. ეს საფუარის გააქტიურების პროცესს დააჩქარებს, თუმცა სრულფასოვანი ვერ გახდება. როდესაც მოზელთ, აუცილებლად დააფარეთ სამზარეულოს ტილო ან პირსახოცი და ისე გააჩერეთ.

შეცდომა №7: არასწორი გამოცხობა

თითოეული ცომის გუნდის მასა ერთნაირი უნდა იყოს იმის მიხედვით, თუ რა ზომის ფორმებში აცხობთ. გამოსაცხობი ფორმები ბოლომდე არ უნდა შეავსოთ. უნდა გამოიყენოთ 2/3 და კიდემდე 1,5-2,5 სანტიმეტრი დატოვეთ.
დასაშვები ტემპერატურა 160-180 გრადუსია. პასკას გამოსაცხობად დრო სჭირდება, ამიტომ, თუ იჩქარებთ და სწრაფადვე გამოიღებთ ღუმელიდან, ცუდ შედეგს მიიღებთ. მას შემდეგ, რაც გახურებულ ღუმელში მოათავსებთ, კარი იშვიათად გააღეთ. თუ საერთოდ არ გამოაღებთ, უკეთესია.

შეცდომა №8: არასწორი გაგრილება

იმისათვის, რომ უკვე გამომცხვარი პასკა არ ჩავარდეს, რბილი ტილო გადააფარეთ და დაელოდეთ მის გაგრილებას. საშუალოდ, ამ პროცესს 2-დან 5 საათამდე სჭირდება, რაც პასკის ზომაზეა დამოკიდებული.

5659
ბეჭდვა
მოგვწერეთ თქვენი შეკითხვები და მოსაზრებები
კომენტარები (0)
კომენტარი ჯერ არ გაკეთებულა
მსგავსი სიახლეები
ყველაზე კითხვადი