დედის შემყურეს, კარგი ფენოვანი ცომის რამდენიმე საიდუმლო შემომრჩა და ამ წინასადღესასწაულო პერიოდში მინდა თქვენც გაგიზიაროთ ჩემს ბავშვობაში, როცა საკონდიტროები ასე ფართო არჩევანს არ გვთავაზობდნენ, ყველა თავმოყვარე დიასახლისი თვითონ უზრუნველყოფდა სადღესასწაულო სუფრას ნამცხვრებით. საბედნიეროდ თუ საუბედუროდ, დედაჩემი ძალიან დახელოვნებული გახლდათ ამ საქმეში და არც სათანადო „აღიარება“ აკლდა სანათესაოში, სამაგიეროდ, ნათესავ-ახლობელთა ოჯახურ სუფრებზე უნამცხვოდ მისვლის მორალური უფლება, პრაქტიკულად, ჩამორთმეული ჰქონდა. განსაკუთრებით მისი „ფენოვანი“ იმსახურებდა დიდ მოწონებას, რომელიც საოცრად ჰაეროვანი ცომით მზადდებოდა. ამ ცომის მოზელა მთელი რიტუალი იყო - ზელვა, ბრტყელება, გაყინვა, ისევ ბრტყელება და ა. შ. რეცეპტების გაზიარებასაც ხომ დრო უნდოდა - ყველას სურდა რეცეპტი ჩაეწერა, ერთი ქალბატონი პირდაპირ სახლში მოგვადგა - რეცეპტით ზუსტად ასეთი არ გამომივიდა და პროცესი მაყურებინეთო...
მოკლედ, დედის შემყურეს, კარგი ფენოვანი ცომის რამდენიმე საიდუმლო შემომრჩა და მინდა თქვენც გაგიზიაროთ.
1. გამოიყენეთ მხოლოდ უმაღლესი ხარისხის ფქვილი. მომზადებამდე რამდენჯერმე გაცერით. ასე ჟანგბადით გამდიდრდება და ძალიან ჰაეროვანი ცომი გამოგივათ
2. მარილი დიდ გავლენას ახდენს ფენოვანი ცომის ელასტიურობასა და სიმკვრივეზე. იგივე ითქმის ძმარსა და ლიმონმჟავაზე. ამიტომ ზედმიწევნით ზუსტად დაიცავით დოზები.
3. როგორც წესი, ფენოვანი ცომისთვის ჩვეულებრივ ცივ წყალს იყენებენ. გირჩევთ, წყალში ცოტა რძე გაურიოთ - ძალიან აუმჯობესებს გემოს.
4. გაყინულ მარგარინს ჯობია უბრალოდ, ცივი მარგარინი გამოიყენოთ, რომ მერე გაბრტყელება გაგიადვილდეთ. რაც უფრო მაღალია მარგარინის ცხიმიანობა, მით უფრო ჰაეროვანია ცომი
5. ერთ-ერთი საიდუმლო გაბრტყელებაშიცაა. ფენოვან ცომს რამდენჯერმე აბრტყელებენ, მერე სამად ან ოთხად კეცავენ და მაცივარში ინახავენ 30 წუთით. ეს პროცედურა მინიმუმ 3-ჯერ, უკეთეს შემთხვევაში კი 4-6-ჯერ გაიმეორეთ. აბრტყელეთ ერთი მიმართულებით და თანაბრად დააწექით საბრტყელებელს.
6. დაჭერით ძალიან მჭრელი დანით, რომ ნაპირებზე არ აიკროს და ფორმა არ დაკარგოს.
7. ფენოვანი ცომი 220 გრადუსზე უნდა ცხვებოდეს