გოგონა, რომელიც იშვიათი გენეტიკური დაავადების გამო სულ იღიმის - მშობლები

2021 წლის დეკემბერში სამხრეთ ავსტრალიელ წყვილს - კრისტინასა და ბლეიზს პატარა გოგონა შეეძინა. ბავშვს აილა დაარქვეს. მშობლები მისი დაბადებით გახარებულები იყვნენ, თუმცა მალევე აღმოაჩინეს, რომ ბავშვს პრობლემა ჰქონდა. გოგონას დაბადებისთანავე ზედმეტად ფართო პირი შენიშნეს. ამ ანომალიას ორმხრივი მაკროსტომია ეწოდება. ანომალიის გამო, ნაყოფის ტუჩის კუთხეები იზრდება და კონკრეტული ფორმა არ აქვს.

გენეტიკურ დაავადებას მრავალი უსიამოვნო შედეგი ახლავს. მაგალითად, მაკროსტომია არის მიზეზი იმისა, რომ აილას ნორმალურად ჭამა არ შეუძლია. თუმცა, პირველი, რაც გოგონას ვიზუალურად ეტყობა, ღიმილია. ყველა ამბობს, რომ ბავშვი სულ იცინის.

საინტერესოა ისიც, რომ მსოფლიოში აღნიშნული დიაგნოზი სულ 14 ბავშვს დაუსვეს და ერთ-ერთი სწორედ აილაა. პატარა გოგონას ოპერაცია სჭირდება, რომ ეს გენეტიკური დეფექტი აღმოიფხვრას და ვიზუალურად ტუჩის კუთხეები გამოიკვეთოს. თუ სპეციალური პლასტიკური ქირურგია არ ჩატარდება, ბავშვს კვებასთან დაკავშირებით სულ უფრო მეტი პრობლემა შეექმნება. როგორც ექიმები ამბობენ, გაკერვის შედეგად შესაძლოა, მცირე ნაწიბურები დარჩეს, თუმცა მოგვიანებით მისი გამოსწორებაც შესაძლებელი იქნება.

ჯერჯერობით პატარა აილას ოპერაცია არ გაუკეთებია. მისი მშობლები სოციალურ ქსელებში ბავშვის ფოტოებსა და ვიდეოებს აქვეყნებენ და სურთ, ამ მიმართულებით ცნობიერება გაზარდონ. აილა კი უამრავ თბილ კომენტარს იმსახურებს და ბევრი ადამიანი მას გამოჯანმრთელებას უსურვებს.