"გოგიჩამ ასე გადაწყვიტა, წავიდა და გოგიჩას ჩაეხუტა..." - მსახიობი იოსებ გოგიჩაიშვილი გარდაიცვალა. რძლისა და შვილიშვილების ემოციური სიტყვები - მშობლები

მსახიობი, საქართველოს დამსახურებული არტისტი იოსებ გოგიჩაიშვილი 86 წლის ასაკში გარდაიცვალა. როგორც ცნობილია, ის ბევრისთვის საყვარელი გოგიჩას, გიორგი გოგიჩაიშვილის მამა იყო. ოჯახის წევრები - შვილიშვილები და რძალი - ნათია ბანძელაძე, სოციალურ ქსელში ემოციურად ემშვიდობებიან:

ნანუკა გოგიჩაიშვილი:

"ჯერ ვერ ვიაზრებ და სათანადოდ ვერ გესიყვარულები... მადლობა ყველაფრისთვის. შენ ჩვენი ბავშვობა დაბადების წამიდან დაუვიწყარი გახადე!"

ნინი გოგიჩაიშვილი:

"ჩემი მზის სხივი, ჩემი უსაყვარლესი ბაბუ!

დიდი ადამიანი დიდი გულით!

ურთულესია, შენთან დამშვიდობება და არც მინდა ამ რეალობის აღქმა".

ნათია ბანძელაძე:

"იცით, როგორი იყო ჩემი სოსიკო, მზეს რომ 9 სხივი აქვს, იმაზე თბილი, კაშკაშა, სიცოცხლით სავსე. იცით, როგორი იყო ჩემი სოსიკო? ყველას რომ ყოფნიდა მისი სიყვარული. იცით, როგორი კაცი დაკარგა ამ ქალაქმა: კეთილზე კეთილი, ტკბილზე ტკბილი, ნიჭიერი, კაშკაშა ვარსკვლავი. რომელიც ისე ბრჭყვიალებდა, არავის წვავდა. ჩემმა, ჩვენმა ყველაზე დიდმა გოგიჩამ ასე გადაწყვიტა, წავიდა და გოგიჩას ჩაეხუტა... მიყვარხართ, ბიჭებოოო, როგორ არ დამინდეთ, თქვენ ხომ ყველაზე კეთილი ადამიანები იყავით ამ სამყაროში...

მიყვარხარ - ცოტაა ეს სიტყვა, მტკივა, ძალიან მტკივა ახლა უკვე ყველაზე დიდი გოგიჩა".

იოსებ გოგიჩაიშვილი სხვადასხვა წლებში იყო გორისა და რუსთავის თეატრების მსახიობი. 1976 წლიდან იყო მარჯანიშვილის თეატრის მსახიობი. გადაღებულია ფილმებში: „ერთი ცის ქვეშ“ (1961), „მე ბებია, ილიკო და ილარიონი“ (აგიტატორი, 1962), „შეხვედრა წარსულთან“ (აკია, 1966), „დათა თუთაშხია“ (ნიკიფორე ბუბუტეიშვილი, 1978), „ხსოვნა“ (1989), „თეთრი ბაირაღები“ (ზედამხედველი, 1990), „ღმერთო, რისი გულისთვის“ (უმადური, 2003) და სხვა.